Гьаму йигъари РД-йин Правительствойин председатель Аьбдулмуслим Аьбдулмуслимовдин регьберваликкди кIули гъубху оперштабдин заседание-йиъ РД-йин образованиейинна илимдин министр Ягь’я Бучаевди къайд гъапIганси, Дагъустандиъ гъюру йисан 141 мектебдиъ бинайиан расвалин ляхнар кIули гъахиди.
Министрин гафариинди, 2023-пи йисан, региондин «Образованиейин мектебарин гъурулушар цIийи алаувал» программайин серенжемарин графикдиз асас вуди, республикайин 37 муниципалитетдиъ уьмуми образование тувру 141 тикилиш, гьадму гьисабнаан РД-йин образованиейинна илимдин министерствойин дахилнаъ айи 11 идара рас апIуз планламиш дапIна.
Дурарикан 30 муниципалитетдин 105 мектеб бинайиан расвалин ляхнар гъахбан программайик 2021-пи йисан туву аьрзйириинди РФ-дин мярифатнан министерствойи кирчнайидар ву. Мектебар рас апIбан ляхнариз харж апIуз 2,6 миллиард манат улупна. Думу дакьатарикан 1,9 миллиард манат бинайиан расвалин ляхнар гъахуз, 735,7 миллион манат – РФ-дин мярифатнан министерствойин къарариинди тасдикь дапIну, тербия ва аьгъювалар тувбан цирклиан лазим вуйи вари алатар, авадлугъар ва китабар масу гъадагъуз харж апIиди.
9-пи ноябриъ РД-йин Правительствойин председатель Аьбдулмуслим Аьбдулмуслимовдин Табасаран райондин глава Мягьямед Къурбановдихъди гъабхьи гюрюшдиъ муниципалитетдин яшайишдинна экономикайин артмиш’валин аьгьвалатнакан сюгьбат гъубхну.
Мягьямед Къурбановди мялум гъапIганси, бинайиан рас апIувал тIалаб апIурайи мектебарин ва тешкилатарин месэла гьял апIбан бадали, Табасаран районди уьмуми образованиейин 24 тешкилатди «Образованиейин мектебарин гъурулушар цIийи алаувал» гьюкуматдин программайик кучIвуз аьрзйир хъадаъна. Мурарикан 8 тешкилат – «Табасаран райондин гимназия» МКОУ, Хючна гъулан 1-пи нумрайин многопрофильный лицей ва 2-пи нумрайин СОШ, ТинитI, ЦIанак, ТIаттил, Кьюракк, Хели-Пенжик гъуларин мектебар – кьаназ гъидритдии, шлубкьан ухди рас апIбан гьялназ дуфна.
«Рас дапIну ккуни мектебарилан гъайри, аварийный гьялнаъ айи 12 мектеб образованиейин цIийи тешкилатар тикмиш апIбан программайик каъну ккунидар ву. Гъийин йигъаз дурарикан 6 мектеб федеральный ва региондин программйирик каъна, имбударинра проектно-сметный документар гьязур дапIна. 2023-пи йисаз вуйи республикайин бюджетдиъ дурар тикмиш апIуз пулин дакьатар жара апIувал ккун апIурча», – гъапну райондин главайи.
Гюрюшдин натижайиъ Аьбдул-муслим Аьбдулмуслимовди му месэла гьял апIуз тялукь министерствйириз лазим вуйи табшуругъар тувбан гьякьнаан гаф тувну.
Хив райондин образованиейин отделиан учуз хабар тувганси, 2023-пи йисан зиихъ къайд дапIнайи программайиинди расвалин ляхнар гъахру мектебар райондиъ адар. Амма 2022-пи йисаз улупнайи Гъвандик ва ЦIийи Фрюгъ гъуларин мектебариъ рас апIбан ляхнар давам хьиди. Хъа 2024-пи йисан рас апIуз Хив, Мажвгул, ва Цнал гъуларин мектебар улупна.
