Гьар йисан 10-пи ноябриъ Урусатдин Федерацияйиъ айтIан ляхнарин органарин гъуллугъчийин йигъ къайд апIури шулу. Думу йигъ хабарсузди ктабгъуб дар, 1917-пи йисандин 7-пи ноябрин социалист инкъилабдин кьяляхъ шубудпи йигъан советарин гьюкми рабочий милиция арайиз хувалин гьякьнаан къарар кьабул гъапIнийи. Сифте думу гъуллугъчйир ерли советарин дахилнаъ гъахьнийи, цIиб кьанди НКВД-йин, хъа Ватандин Аьхю дявдин кьяляхъ – айтIан ляхнарин министерствойин дахилназ тувнийи.

 

 

Деврин цIийи технологйир ва йисариинди ахтармиш дапIнайи ляхнин къайдйир гъийин полицияйин гъуллугъчйирин ужуб ляхнин гирав ву. Уьлкейиъ инсан йивну йикIувалин тахсиркарвалар саки 99% ачмиш апIура, мициб хъуркьувал Советарин деврин йисарикьан гъабхьиб дар. Хъа цифрайин девриъра кмиди тахсиркарвалар ачмиш апIбан асас ляхин инсандикан асиллу вуди гъубзра.

«Къанун уьбхбан гъаравлиъ дийи-гъувал, ватандашарин ихтиярар уьрхювал, тахсиркрариз рякъ гьадабтIувал — му рягьят ляхин дар. Дициб гъуллугънаъ ижми рюгь кайи, кьягьял инсанар лихуру. Полицияйин гъуллугъчйири уьлкейин вари регионариъ фидакарвалиинди ва намуслувалиинди чпин гъуллугъ гъабхура, идарайин аьдатар лайикьлуди давам апIура», – гъапну РФ-дин айтIан ляхнарин министр Владимир Колокольцевди.

Дугъриданра, полицияйиъ, жарарин уьмур уьбхбан бадали, чан жан фида апIуз гьязур вуйидар, гьякьлу къарар кьабул дапIну, дишлади думу тамам апIуз аьгъю касар лихура.

АйтIан ляхнарин органариъ гизаф ихь ватанагьлийири гъуллугъ гъапIну ва гьамусяаьт му гъуллугънаъ айидарин кьадарра цIиб дар. Дурарикан гьарсарикан хайлин ужудар гафар пуз шулу.

«Табасарандин нурар» газатдин коллективди, МВД-йин ветеранар кIулиъ ади, гьюкуматдин къанун уьбхру органарин вари вакилар айтIан ляхнарин органарин гъуллугъчийин йигъахъди тебрик апIурача, дурариз варидариз жандин сагъ’вал, ляхниъ саламат йигъар, дюн’яйиъ ислягьвал хьувал ккун апIурача.