Гьаму йисан гирами Рамазандин ваз улубкьайиз улихьна Дербент райондин Жемикент гъулан агьали Гянжеви Гьяжибалаевди Мягьяммад Пайгъамбрин (с.аь.в.) гьюрматназ булагъ тикмиш гъапIну. Дидин гьякьнаан учуз муниципалитетдин мялуматарин гъуллугънаан хабар тувну.

Булагъ тикмиш апIбан бадали, Г.Гьяжибалаевди 200 метр шид гъизигну. Хъа дугъу шид гъизигу йишв’ин архитектурайин уткан тикилиш дивну.

«Жвуван гъулаъ, райондиъ айи аьгьвалатнакан фикир апIру, айи месэлйирихьна гъайгъусузвал улулупру, дурар гьял апIуз кюмек тувру агьалйир гъулаъ айивалиин гизаф шад вуча. Гирами Рамазандин вазлиъ Жемикентдин агьалйириз гьамциб пешкеш апIбаз лигну, райондин администрацияйин терефнаан Гянжеви Гьяжибалаевдиз аьхю чухсагъул мялум апIурача»,

– гъапну вахтназ вуди Дербент райондин администрацияйин главайин вазифйир тамам апIурайи Сеидмягьямед Бабаевди.

Гянжеви Гьяжибалаевдин гафариинди, дугъан кIваъ хъанара швнуб-сабсана булагъ рас апIбан ва цIийидар тикмиш апIбан ният а. «Гъулаъ булагъ дивуз ният гъубшу йисан гъапIнийза, шюкюр ибшри Аллагьдиз, ният кIулиз адабгъуз мумкинвал тувну. Гьаму булагъ тикмиш апIурайи вахтна, айи мумкинвалариз дилигну, хъана булагъар рас апIуз йиз кIваан ният гъубш-нийиз. Му жюрейин рягьимлувалин акцияйин тереф дюбхну, гъулан, райондин ва республикайин агьалйирра думу уж’валнан гьяракат кIулиз адабгъуз сатIи шул кIури, умуд кивраза», – гъапнийи Г.Гьяжибалаевди.