Гъюру урхбан йислан башламиш дапIну, мектебариъ цIийикIултIан дявдин ккергъбан гьязурлугвалин предметдиан дарсар кивуз хъюгъбанди ву. Гьаддин гьякьнаан Урусатдин мярифатнан министр Сергей Кравцовди мялум гъапIну.

 

 

«Гьамусяаьт мектебдин урхбан программайиъ му курсар тIаъбан зиин ляхин гъабхура, гъюру йисан 1-пи январиз думу месэла гьял дапIну ккудубкIидича. Хъасин мектебариъ ахтармишар гъахиди ва, гъюру урхбан йисхъан хъюгъну, дявдин ккергъбан гьязурлугвалин дарсар мектебарин программайиъ тIаъди», – гъапну дугъу.

Му предметдиан аьгъювалар дарсарин гъирагъдиъ вуйи вахтна гъадагъуз хьибди. Министерствойи, дявдин ккергъбан гьязурлугвалин курс тартиб дапIну, заан классариъ урхурайи баяр-шубариз ОБЖ-йин предметдиъ кьюб цIийи модулариинди тIапIбанди ву. Дурар уьмуми образованиейин асас проектдик каъну.

Гьаци мектебдиъ урхурайи баяр-шубари жергейиъди гъягъбан, гьязурлугвал уьбхбаан, хусуси хатIасузвалин ва медицинайин сабпи кюмек тувбаан, яракьдикан ва думу ишлетмиш, апIбаан дид’ан йивбаан ва гьацира хилихьди ккатIахьру гранатар ишлетмиш апIбаан аьгъювалар гъадагъиди. Мидланра савайи, заан классариъ урхурайидари гъийин деврин уьмуми кьушмарин женгнаъ жвуву гьапIну ккундуш, БМП-йин мотострелковый отделениейин гъурулушдикан ва яракьдикан, эскри уьрхюрайи йишварин инженервалин дакьатарин гьякьнаан аьгъювалар гъадагъиди ва текди вуйи окоп фу вуш, аьгъю апIиди.

Мектебдин образованиейин дахилназ НВП-йин предметдиан дарсар кьяляхъ хпан гьякьнаан улихьнаси сабишв’инди швнур-сар сенатори ва Госдумайин депутатари теклиф гъапIнийи. «Дюзвалин Урусат – Гьякьвалихъанди» партияйин кIулиъ айи Сергей Миронов гьациб теклиф хьади РФ-дин мярифатнан ва оборонайин министерствйириз илтIикIну. Дявдин идарайиъра му жягьтлувал вахтназ гъилигуб вуйиб тасдикь гъапIну ва дидин тереф гъюбхну. Оборонайин министерствойиъ гъюру кьюд йисан мектебариъ му предмет аьгъю апIуз 140 сяаьттIан кам дарди жара апIуб лазим вуйивалин гьякьнаан къайд гъапIну.