Улихьнаси шагьрарин дараматарин улихь хьайи гьяятар ккабалгувалин ужудар проектарин гьякьнаан вари Урусатдин конкурс кIули гъубшну. Думу конкурсдиъ 1-пи йишван сагьиб Дагъустандин Огни шагьур гъабхьну.

РД-йин тикилишчивалин Министерствойин пресс-гъуллугънаан мялум гъапIганси, му конкурсдиъ иштирак хьуз ихь региондиан 5 шагьритIан аьрзйир тувундар. Конкурсдин натижйириинди, РФ-дин Правительствойи чан буйругъниинди конкурсдин гъалибчйириз, шагьрарин айитI уччвудар, рягьятвал гъадабгъбан шартIар тешкил апIбан бадали, субсидйир жюрейиинди 5 миллиард манат жара апIиди. Хъа Дагъустандин Огни шагьриз – 75 миллион манат.

Му конкурсдин дахилнаъди шагьри «Пекдин рякъ» проект улупну. Думу проект асас вуди шагьрин Лениндин ччвурнахъ хъайи кьялан кючейиъ инсанар гъягъру рякъ рас апIуз ва думу рякъ ккабалгуз диш дапIнайиб ву. Фицики, думу кюче варитIан гизаф инсанар гъягъюрайиб ва тарихи кюче ву. Душваъ шагьрин яшайишдин ва культурайин асас объектар, ипIру-убхъру ва шей’ар масу тувру йишвар а.