Ухьуз рябкъюрайиганси, Дагъустан Республикайин саки вари шагьрариъ, районариъ ва гъулариъ сабхилди «Вари сатIиди» кIуру акция кIули гъябгъюра. Хив районра му акцияйихьан ярхла гъубзнадар.

 

 

Гьаму йигъари Ярмет Ярметовдин къарарниинди райондиъ къайд дапIнайи акция кIули гъабхура. Дидин асас метлеб – мобилизацияйин дахилнаъди душнайидарин ва хусуси метлеб айи дявдин операцияйиъ гъийиху эскрарин хизанариз ляхнииндира, гафнииндира кьувват ва кюмек тувувал ву.
Акцияйиъ, лазим вуйи тадарукар хьади, дурар улупнайи хизанарихьна рукьури, райондин депутатари, дишагьлийирин союзди, мектебарин админис-трацйири, ерли телевидениейин вакилари, волонтерари, гъуларин главйири ва агьалйири иштирак’вал гъапIнийи.

Мидланра савайи, райондин депутатарин собраниейин председатель Садикь Исрафиловди, баярин абйир-бабариз, хизанариз психологияйин, сагъламвал уьбхбан, райондин ЦРБ-йиъ ккаъбан, акварин ва газдин гьякьнаан кюмек тувбан гъаразнаъ ади, консультацйир гъахури, му месэлйир гьял апIуз мумкинвалар агура.
Чпихьна айи гьякь-гюрматназ, чпи кIваълан душну адрувализ лигну, эскрарин абйир-бабарира райондин руководствойиз ва му акцияйин иштиракчириз чухсагъул мялум апIура.