Ноябрин 15-пи йигъан «Табасаран район» муниципальный образованиейин депутатарин собраниейин нубатнан 22-пи заседание кIули гъубшну. Заседаниейин ляхниъ Табасаран райондин глава Мягьямед Къурбанов, райондин администрацияйин жавабдар гъуллугъчйир, Жямяаьтлугъ палатайин председатель, Агьли касарин советдин председатель ва гьацдар жарадар иштирак гъахьну.
Гьял апIбан бадали, заседаниейиз 6 месэла адагънайи. Федеральный къанундиъ тIаънайи дигиш’валариз асас вуди, РД-йин «Табасаран район» МО-йин уставдиъ дигиш’валар тIаъбан гьякьнаан райондин администрация-йин ляхнарин идара апIурайи Аьбдурягьим Аьбдулжелиловди гъаврикк ккаъбан мялуматар тувнийи.
Гьял гъапIу месэлйирин арайиъ РД-йин «Табасаран район» муниципальный райондин 2023-пи йисаз ва пландин 2024-2025-пи йисариз вуйи бюджет кьабул апIбан месэлара айи.
Бюджетдин гьякьнаан доклад хьади Табасаран райондин администрацияйин финансарин идарайин кIулиъ айи Зейфуллагь Рашидов удучIвну гъулхнийи. Дугъан докладдиан мялум гъабхьиганси, 2023-пи йисаз Табасаран райондин бюджетдиъ 1 миллиардна 504 миллионна 513 агъзур манат харжар планламиш дапIна.
Зейфуллагь Рашидовди «РД-йин «Табасаран район» МР-ин депутатарин собраниейин 2021-пи йисан 22-пи декабриъ 64-пи нумрайиккди адабгънайи «РД-йин «Табасаран район» МР-ин 2022-пи йисаз ва пландин 2023-2024-пи йисариз вуйи бюджетдиъ дигиш’валар тIаъбан гьякьнаан» вуйи месэлайинра гъаврикк ккаънийи.
«Табасаран район» МО-йин уставдиз асас вуди, Табасаран райондин главайи «Табасаран райондин гьюрматлу ватандаш» кIуру ччвур тувбан месэлара гъитIибккнийи. Заседаниейиъ Урусатдин Игит Эседуллагь Аьбдулмуминовч Абачевдиз, Урусатдин Игит Руслан Маркизович Къурбановдиз, Урусатдин Игит Энвер Альбертович Небиевдиз «Табасаран райондин гьюрматлу ватандаш» ччвур тувбан гьякьнаан къарар адабгъну.
Серенжемдин аьхириъ Табсаран райондин глава Мягьямед Къурбановди, ватандиз читин шартIариъ ватанпервервалин тереф уьбхюрайивализ лигну, депутатариз чухсагъул мялум гъапIну, гьацира агьалйирихъди гъаврикк ккаъбан ляхин гъабхбан важиблуваликан гъапну.
