15-пи ноябриъ Мягьячгъалайин Гуманитарвалинна педагогвалин колледждиъ, «Мектебдиъ математикайин образование: аьдатар ва цIийивалар, теория ва практика» тувну, аьлим-математик, профессор Шихялиев Ханяли Шихалиевич кIваин апIбаз ва дугъан гьюрмат уьбхбаз бахш дапIнайи илимдинна практикайин региондин конференция гъабхьну.
Серенжем ачмиш апIури, колледждин директор, педагогвалин илмарин кандидат, доцент Алаудин Аскеровди къайд гъапIганси, Х.Шихялиевди неинки Дагъустандиъ, хъа гьацира дидин гъирагъариъра математикайин илим артмиш апIбак аьхю пай кивну. Думура учв сифте Шихялиевдин студент, хъасин гъарашугъ вуди гъахьну.
Конференцияйиъ, аьлим кIваин апIури, ДГПУ-йин агъсакълар Вели Загьиров, Мягьямед Хайбулаев, Дибир Нурмягьямедов ва хъана жарадар удучIвну гъулхнийи.
Аьлимдин шуру, Аида Ханялиевнайи, чан адашдин гьюрмат уьбхюри, му конференция тешкил гъапIдариз ва кIули гъубхдариз чухсагъул мялум гъапIнийи.
Видеойин аьлакьайин кюмекниинди конференцияйиъ гьацира профессорин бай Шихяли Шихялиевра иштирак гъахьнийи. Дугъу, мялуматарин технологйирин цирклиъ региондин ва федеральный конкурсариъ гъалиб духьну, гьамусяаьт Сербияйиъ IT-компанияйин программистди ляхин апIура.
Хъасин конференция «гергми стол» жюрейиинди давам гъабхьнийи. Конференцияйин иштиракчйири ккергъбан ва заан классариъ математикайин дарс кивбаъ гьял дапIну ккуни месэл-йирикан, ЕГЭ гъабхуваликан, ФГОС-дин тIалабар уьрхюваликан ва гъийин мектебариъ урхурайидарин му дарснахьна вуйи маракьлуваликан ва удукьуваларикан сюгьбат гъубхнийи.
Ханяли Шихялиевич математикайиан йицIбариинди илмин пособйирин ва мектебдин учебникарин автор ву. Дугъан чалишмиш’валариинди Дагъустандин педуниверситетдиъ аспирантура ачмиш дапIну, «Аьгъювалар ва тербия тувбан теория ва методика (математика)» пишекарвалиан диссертационный совет яратмиш гъапIну.
Математикайин илмиан гъабхури гъахьи баркаллу ляхниз лигну, аьлим хайлин гьюрматнан ччвурар ва заан пешкешар тувбиинди лишанлу гъапIну: «РСФСР-ин халкьдин образованиейин отличник», «СССР-ин мярифатнан отличник», «РД-йин мектебарин лайикьлу мялим», «РФ-дин заан мектебдин лайикьлу гъуллугъчи».
