Гъубшу гьяфтайиъ 19-пи ноябриан 20-пи ноябриз Табасаран райондин Кьалухъ Мирзайин ччвурнахъ хъайи спортдин дараматдиъ, Дагъустан Республикайин волейболин кубокдин турнир кIули гъубшну.
Думу турнир, республикайин волейболин федерацияйи, Табасаран райондин администрацияйихъди сатIиди тешкил дапIнайиб вуйи. Гьаму кубокдиз вуйи аьхиримжи турнир 20 йис улихьна, 2002-пи йисан тешкил гъапIнийи. Хъасин турнир кIваълан гъубшнийи. Му талитар, турнир цIийи алапIбан бадали, Табасаран райондин глава Мягьямед Къурбановди кIваин гъапIну.
Турнир ачмиш апIури, Мягьямед Къурбановди хабар тувганси, эгер волейболин федерация къаршуди дарш, Табасаран район му талитар гьар йисан кIули гъахуз гьязур ву.
Серенжемдиъ Дагъустан Респуб-ликайин волейболин федерацияйин президент Мягьямед Гаирбеков, ДГУ-йин профсоюздин председатель Нухкьади Рабазанов, Табасаран райондиан волейболин юкIв али тамашичйир иштирак гъахьнийи.
Кубок бадали 6 команда спортдин бягьснаъ учIвнийи: Табасаран, Хунзах, Хасавюрт районарин, Мягьячгъала шагьрин командйир, республикайин жигьиларин сатIланди вуйи команда ва жюрбежюр районарин волейболистарикан ибарат дубхьнайи «ЦIараки» ччвур али команда. Кьюдпи йигъан гьамрарикан 4 ужударсдар командйири талитарин гъалибчйир тяйин гъапIнийи.
Финализ Хасавюрт ва Табасаран районарин командйир удучIвнийи. Натижайиъ Хасавюрт райондин команда гъалиб гъабхьну ва диди Дагъустан Республикайин волейболин кубок гъазанмиш гъапIну. Кьюбпи йишв Табасаран райондин волейболистари гъибисну, шубубпи йишв – «ЦIараки» командайи.
«Волейбол Табасаран райондиъ ва-ритIан ад айи спортдин жюрйирикан саб ву. Мициб заан дережайин турнир тешкил апIбиинди Табасаран райондиъ думу хъана артмиш хьибди. Гьамциб волейболин кубокдин турнир, гьар йисан Табасаран райондиъ уйнамиш апIури гъабхьиш, ужу шуйи», – гъапнийи турнир ккудубкIру йигъан ра Мягьямед Къурбановди.
Гъалиб гъахьи командйир медаларихъди, грамотйирихъди ва багьалу пешкешарихъди лишанлу гъапIну. Тамашачйириз варитIан кьабул гъаши спортсмен Табасаран райондин командайин капитан Садикь Османов гъахьну, ва дугъазра тялукь пешкеш тувну.
