«Гьарин кIакIариъ нур туврайи уьру вичар дутIназа, хачар-варжйирин афрар уржураза, ургуб жарнан цIикбар ккирчраза, аварши ва нитIиф гьязур апIураза, амма бабаз гьич сабдихъанра я тIяаьм гъюрадар, я дурар ул’ин иливишкьан рякъюрадар. Баяр дявдиъ а, баяр…»

 

 

Гъи, ихь уьлкейин маракьар уьрхюри, дявдин цIин майдандиъ жанар туврайи ва игитвал улупурайи ихь баярихъ юкIв ибшурайи Сябат Гьямидовайин кIваан гъябгъюрайи гьарай исихъ чап апIурача.

«ГъипIубди – юкIв, алабхьубди – жан ипIура» кIуру абйирин мисал фицдар дюшюшариъ ишлетмиш апIуйкIан, кIуйза. Магьа гъи хусуси метлеб айи дявдин операция халкьдиз ипIру уьлихъдира, алабхьру палатдихъдира гъафун дубхьнадаринхъа? Саб дакьикьайиъкьан архаинвал адарзуз. Гьар жвуми йишван, ккидисури, узу зиихъ кудухнайдар адагъури, гъуни-гъуншйириз капIри, пай апIураза. Уьмриан гъушдарин садакьа ибшри, миди вуйидарин улихь дугъубжври! КIулкан чIаркьан ктадабхъди, ичв хизан-кюлфетдиина кьадар-кьисмат ишричву, жан бабандар. Бабу учву вари сабси дидисна. Кьюб хил дазаргну, Худайиз шюкюр ибшри кIураза. Ихь уьлкейин кIулиъ айир саб ликрин улихь гъахьундайиш, ихь ругдиин, ихь урчIарихъ му гъазават гъабхьнийиш, хъана аьхю дерд ва зулум дайинхъа!? Гъит байгъуш ибшри чав.

Хайирлу нивкIар рякъюразуз бабаз. Хъа йиз нивкIари, фагьум-фикрари ва хиялари узуз кучIал ва узу алдатмиш дарапIрайивалиин умудлу вуза баб. Бабан улар рякъ’ин ализ, ва гьаму йигъари, кIваъ гъалибвал ади, учву йиз улихьна, хъа узура, пайдгъар улихь хьади, хилиъ, швнуб-саб жюрейин меълишнарин сини хьади дуфну рацц’ин далдабуйинна зурнайин сеснахъди, ялхъван кIул’инди кьабул апIидизачву бабу!»
Гъит, бабан гафариз кьувват туври!