Улихьна йигъари Дагъустандин китабарин чапханайиъ табасаран шаир Керим Маллаевдин «Сикинсуз уьмур» (шиклиъ) кIуру ччвур тувнайи китаб удубчIвну.
«Му китабдиъ машгьур табасаран шаир, мялим ва тербиячи Керим Маллаевдин аьхиримжи йисари гъидикIу эсерар а. Шаири чан эсерариъ китаб урхурайидариз багъри ватандикан, Табасарандин гюрчег табиаьтдикан, чан зегьметкеш ватанагьлийирикан, дурарин дуланажагъдикан ктибтура. Уьмриъ учв Керим Маллаевра сикинсуз юкIв айи адми вуйи. Дугъаз чан ватан, багъри гъул, юрд, чIал хусуси веледарси багьа вуйи ва гьадму багьавалин, ккунивалин манишин, тIяаьм, ялав чан яратмиш’валин рякъюъ такабурди атIабгна», – дибикIна китабдин сифте гафнаъ шаирин дуст ва гъарашугъ вуди гъахьи Кюребег Мурсаловди.
Керим Маллаев 2021-пи йисан 19-пи ноябриъ 73 йисаъ ади уьмриан гъушну. Хъа халис шаирар йихурдар – дурар чпин китабариъ гъузру. Керим Маллаев гъийин деврин табасаран литература артмиш хьпак лайикьлу пай киву халис шаирарикан сар вуйи. Гъапибдиз кьувват вуди кIурза, чан устадвалин, чIалнан сазандарвалин ва аьяндарвалин лишнариинди, аьхюр аьхюрси, бицIир бицIирси дидисну, дурар гюзет апIру чан адмивалин янашмиш’валиинди, хумарвал дябхъру такабур эсерариинди, халкь, чIал, культура, фольклор ва тарих бадали алдагъу ликариинди ихь гьарсарин гевюлиъ ва фагьмиъ чав гъибту хусуси хатIниинди думу, хядси, аьсрариинди кархьну гъузди.
Керим Маллаев халис шаир ва дерин кьаб ккайи табасаран хизандин кIул ву дупну, гъибтуз шулдар. Ухьуз думу Дагъустан Республикайин лайикьлу мялимси, райондин агъсакъларин Советдин председателси, Урусатдин писателарин Союздин членси, ТОКС-дин дестейин кIулиъ айи кассира мялум вухьуз. Керим Маллаев гъи Хив райондин агьалйириз гьуркIри адар. Гьяйиф…
«Сикинсуз уьмур» китабдиз сифте гаф гъибикIур ва думу цIалцIам гъапIур шаирин юкIв алирсир дуст Кюребег Мурсалов вуйивали ухьуз дугъан уьмрин гизаф терефар ачмиш апIура. Ав, К. Мурсалов вари жигьатариан дугъан дуст вуйи: ккунш мялимси, ккунш шаирси, ккунш гъулажвиси. Ва дустран уьмрикан, гьиссарикан ва гъалабнакан дугъхьанси кьатI’иди имбударихьан пуз хьидайи. Гьаддиз йиз бицIи макьалайин аьхириъ хъанара Керим Маллаевдикан ва дугъан китабдикан К. Мурсаловди гъапи гафарихьна илтIикIуз ккунди азуз: «Намуслу адми мумкин дар мициб дюн’яйиъ сикинди, юкIв архаинди дуланмиш хьуб. Уьмур гьарган абцIна гьядисйири. Ужубра, харжибра гьарган чиб-чпихъди чвена чиси хъайидар ву. Гьаддиз чIиви инсандин уьмурра сикинсуз ву. ЮкIв айири дерд апIиди, дерд вахтну сагъра апIиди ва шадвалра хъапIди. Хъа йиз уьмриъ кархьну ургурайи хядси гъахьи Керим зат кIваан гъягъидариз yзу нефес хътабгъури имбукьан ккагьди. Гьаци сар узуз ваъ, хъа вари чпин кьисматну дугъахъди таниш хьуз мумкинвал гъабхьидариз. Узу инанмиш вуза гьаддиин, аьхю гьярфналан вуйи шаир Керимдин цIийи китабдира ихь китабарин жергейиъ чан хусуси йишв бисрубдиин».
