Ццийин урхбан йис ккебгъну, баяр-шубар урхбиин алтIахьайизра, мектебарикк тIуркIру сяняаьтар ккивна кIури, гьар йигъан мектебарин почтйириз гъюрайи пис кагъзари шлубкьан ухди дараматариан вари адауз мажбур апIура.
Цци вари сентябрин ваз гьамци, урхбан саб кIан-кIул адарди, гъубшнийи. Октябрин вазлиъ аьгьвалат цIиб ужувлахъинди дигиш гъабхьнийи. Ва магьа, сабпи четверть ужуди-харжиди ккудубкIну, тятIиларихъан мектебариз дуфнайи баяр-шубар урхбаъ архьрайи вахтна, Мягьячгъала шагьриъ му аьгьвалат хъана текрар шула. Мидихъди аьлакьалуди абйир-бабарин наразивалра йигълан-йигъаз артухъ шула. Дурарин гъавриъ хьуз шулу: мициб гьял давам шули сад-кьюд йигъ дар, саб-кьюб гьяфта дар – вазар ву, хъа урхбан йис гъябгъюра. Заан классариъ урхурайи, ЕГЭ, ОГЭ тувбахьна гьязур шулайи баяр-шубар ва дурарин абйир-бабар гьапIрушра мюгьтал духьна, гьаз мидин аьхир диврадар, кIура…
17-пи ноябрихъанмина Мягьячгъалайин мектебариз ва урхбан кьялан пишекарвалин тешкилатариз тялукь кагъзар гъювал хъана текрар шула. Баяр-шубар ва мялимар чIат удучIвну, урхбан тешкилатар тялукь гъуллугъари, кинологари ахтармиш апIайиз ккилигуз мажбур шула, хъа дурари ахтармиш апIбан ляхнар кIули духну ккудукIайиз, урхбан вахтра аьхирихъна гъюра. Натижайиъ дарсар зяя шула. ЧIуру мялумат, ахтармишар гъахбалан кьяляхъ, саб ражарира тасдикь шуладар.
Мектебарикк тIуркIру сяняаьтар ккивна кIуру мялумат сифте МВД-йин дежурный гъуллугъназ гъюрайиваликан, хъасин душв’ан урхбан тешкилатариз хътапIурайиваликан хабар ади, мидин гьякьнаан артухъди мялуматар гъадагъбан бадали, тялукь суалар хьади РД-йин МВД-йиз илтIикIунза. Министерствойин пресс-гъуллугънан туву мялуматназ асас вуди, айтIан ляхнарин гъуллугъну багарихьди му месэлайин гьякьнаан чпин комментарйир тувбанди ву. Ккилигурхьа…
Къайд апIуб лазим вуки, аьхиримжи йисари, сифте коронавирусдин тIягъвни, гьамус гьамцдар хаинкрарин гьяракатари образованиейин цирклиз гизаф гъулайсузвалар хура. Му дюшюшари баяр-шубарин урхбахьна вуйи маракьлувал зяиф апIура, хъа дици вуйивали абйир-бабарик гъалабулугъвал кипра. Йиз фикриан, гъийин аьгьвалатнаъ ухьу, аьхюдари, сабурлувал улупну, баяр-шубарихъди гаф-чIал дапIну, интернетдин онлайн мумкинваларра ишлетмиш апIури, дурарин урхбахьна вуйи гьевес кьяляхъ хьуз гъидритбан бадали, чара дабгну ккунду.
