Физический касарин чпиз айи мал-девлетналан налог тувру вахт 1-пи декабри ккудубкIура кIури, Дагъустан Республикайин налоговый гъуллугънан управлениейиан мялум апIура.
«Ццийин 21-пи сентябриъ 647-пи нумрайиккди удубчIву Урусатдин Президент Владимир Путиндин Указ-диинди, Украинайин аьтрафариин гъябгъюрайи хусуси метлеб айи дявдин операцияйиъ иштирак хьуз жалб гъапIу агьалйир ктарди, имбудари вариди 1-пи декабриз налог тувну ккунду. Хусуси метлеб айи дявдин операцияйиз жалб гъапIдарин налог тувбан вахт хъанара ярхи гъапIну. Дурар дявдин гъуллугънаан кьяляхъ гъафиган, чпи тувну ккуни налог 3 вазлилантIан тутрувуз дурариз мумкинвал а», — мялум гъапIну республикайин налоговый гъуллугънан управлениейин гъуллугъчи Багьаутдин Аьлиевди.
Мидланра гъайри, Б. Аьлиевди къайд гъапIганси, чпиз айи мал-девлетналан налог тувбан бадали, республикайин агьалйир гъаврикк ккаъбан ляхинра ужуди кIули гъябгъюра. Му терефнаан налоговый органариси, муниципалитетарин администрацйириси, республикайин махлукьатлу хабрарианра инсанариз мялуматар туври, чпиналог тувну ккунивалин дурар гъавриъ тIаъра.
«Пуз ккундузузки, вахтниинди налог тувбан бадали, агьалйириз швнуб-саб мумкинвал а. Гьадрарин арайиъ «Налогар ва пошлинйир тувбан» вая «Налогар туврурин хусуси кабинет» кIуру сервисариан, налоговый органариан дуфнайи кагъзик кайи QR вая штрих коддиинди ичв игьтияжар гьуркIрайи банкдин сервисдиан, ясана яшамиш шулайи йишварин почтайианна МФЦ-йиан.
Эгер гьаму жюрейиинди 1-пи декабриз 2021-пи йисхъан вуйи налог тутрувиш, 2-пи декабрилан гъадабгъну, сарун дид’ин гьар йигъан буржниина гъюру пул иливбиинди, тувну ккуни налогдин пулин кьадар артухъ шулу ва налоговый органарихьан думу налогдин бурж тIалаб апIурайи кагъзарра гъюру. Эгер мидизра иб йивурадарш, суддиз дих апIуру ва суддин приставари кайи бурж вари ктабгъуру. Хъа думу жюрейиинди ктабгъури гъабхьиш, банковский картйир лихуз даршлуганси апIувалра мумкин ву. Гьаддиз, гьамцдар дюшюшар дархьбан бадали, улупнайи вахтназ учв’ин али налогдин бурж тувуз мажбур йихьай», – аьлава гъапIну Багьаутдин Аьлиевди.
