Сергей Меликов Украинайиъ гъябгъюрайи спеоперацияйиъ гъийиху Дагъустандиан вуйи дявдин гъуллугъчйирин бабарихъди гюрюшмиш гъахьну.

 

 

Сифте республикайин кIули айири, гъийиху эскрарин гьюрмат уьбхюри, дурарин суратарин улихь кюкйир дивнийи.

«Ихь игитарин гьюрматлу багахьлуйир! Ичв хизанариз дуфнайи бедбахтвалихъди башсагълугъвал ккун апIураза. Ичв юкIвариъ утIубкьнайи дерд вариди гьисс апIурача, дидихьна вижнасузди янашмиш хьуз шлу кас Дагъустандиъ адар…», – гъапну Главайи ва ватан бадали жан диву гьарсар бай гьюкуматдин пешкешниинди лишанлу апIуз ккайиваликан мялум гъапIну.

Сергей Меликовди спецоперацияйиъ гъийиху эскрарин хизанарин фунуб читинвализра республикайин гьюкмин вакилар кюмек тувуз гьязур вуйиваликан гъапну.

Дугъу къайд гъапIганси, вари муниципалитетарин главйир гъийиху эскрарин хизанарихъди гюрюшмиш шула, чпин гъуллугънан вазифа дару мажбурнамйирра чпиина гъадагъура, сарихьанра гъирагъдиъ гъузуз шуладар.

РД-йин дявдин комиссар Дайтбег Мустафаевди гъийиху эскрарин хизанариз гьюкуматдин терефнаан туврайи кюмекнан гьякьлу уьлчмйирикан ктибтну. Гъийиху эскрарин хизанарин терефнаан санурин гъардши республикайин улихь-кIулихь хьайидариз, чпиз кюмекнан хил гьачIабккурайивализ лигну, чухсагъул мялум гъапIну.