Дада! Му гаф гьарсар бицIири сабпи ражари апIру ва варитIан гизаф кIуру гаф ву. Дюн’яйиъ айи варж агъзрариинди чIаларикан фуну чIалниинди гъапишра, думу гаф уччвуди ебхьуру. Дада варитIан багахьлу инсан ву. Дугъу гьаммишан ухькан фикир апIура, ухьу уьрхюра, ухьу ужувлахъ, зигьимдихъ хъаъра. Дадайи язухъ зигуру, дада ихь гъавриъ шулу, дугъу хил алдабгъуру, саб читинвализра дилигди, чан велед ккун апIуру. Дадайин манишну ва ккунивали ухьу кьаби хьайизкьан уьрхюру.
Дадайин йигъ шадлу ва мяналу машквар ву. Думу йигъ жигьил машквар вушра (Му йигъ 1998-пи йисан тяйин гъапIну), яваш-явашди ихь хизанарин уьмриъ убчIвра. Гьар йигъан фукьан ужудар гафар дадйириз кIури ашра, фукьан машкврар къайд гъапIишра, дурар артухъ хьидар.
Дадайин йигъ къайд апIувалин метлеб – дадайихьна айи гьюрмат уьбхбан аьдат давам, хизандин кьиматлувал мюгькам, ихь уьмриъ варитIан важиблу касди – дадайи дибиснайи йишв лишанлу апIувал ву.
Дадайин юкIв чан веледарихъан гьаммишан убгура, дугъан кIваз йишвну нивкIуъкьан сикинвал адар. Гьамусяаьт Урусатди гъабхурайи хусуси метлеб айи дявдин операцияйиъ баяр иштирак шулайи дадйириз варитIан гъагъиди ву. Вари дюн’яйин дадйирин мурад-метлеб саб ву – Жил’ин ислягьвал ва саламатвал хьуб.
Урусатдин вари шагьрар-гъулариъ дадайин йигъаз бахш дапIнайи серенжемар гъягъюра. Табасаран ва Хив районариъра Урусатди гъабхурайи хусуси метлеб айи дявдин операцияйиъ игитарси гъийиху баярин, яракь хилиъ ади ихь Ватан уьбхюрайи эскрарин дадйирихъди гюрюшар планламиш дапIна.
Гьюрматлу дадйир!
«Табасарандин нурар» газатдин редакцияйин коллективдин терефнаан учву гьаму машкврихъди тебрик апIурача! Дадайин аьхю ва гирами ккунивали ухьуз вари читинвалариан кIул адабгъуз, гележегдик умуд кивуз, хъуркьуваларихьна хилар гьачIарккуз мумкинвал тувра. Дадайин зегьмет варитIан гьюрматлуб ву. Инсандиз, чан фукьан яшар духьнашра, дадайин мани ва ширин гаф, дугъан уларин ккунивалин лигувал лазимди гъубзру. Ичв уларин шаду акв, кIван жумартвал, хиларин манишин багьа вухьуз, хулаъ гьарган берекет, хизандиъ гьарган мясляаьт ибшри, бицIидарин шад сесер хизандиан кам даришри!
Газатдин гьаму нумрайин 7-пи машнаъ ихь шаирари дадайиз бахш дапIнайи шиърар туврача. Думу шиърариъ дадайихьна вуйи аьхир адру ккуниваликан дибикIна.
Шиклиъ: Рукьия Сефербегова, игит баб, ТIюрягъ гъул.
