2022-пи йисан 25-пи ноябриъ Дагъустан Республикайин культурайин лайикьлу гъуллугъчи Муса Мягьямедов вахтсузди уьмриан гъушну.

 

Муса Агьмедович Мягьямедов 1949-пи йисан 5-пи июндиъ Табасаран райондин Хянягъ гъулаъ бабкан гъахьну. 1956-1963-пи йисариъ думу Хянгъярин ургуд йисандин мектебдиъ урхури гъахьну. 1963-пи йисан Хючнаарин кьялан мектебди миржибпи классдиз гъушну ва 1967-пи йисан думу мектеб ккудубкIну.
Муса Мягьямедов бицIидихъан-мина музыкайихьна гьевес айир вуйи. Чан зегьметнан рякъра дугъу 1967-пи йисан Табасаран райондин культурайин хулаъ лихбалан ккебгъну.

Кьюд йисан (1968-1970) Советарин армияйин жергйириъ гъуллугъ дапIну, дугъу культурайин цирклиъ лихувал давам апIуру: сифте автоклубдин заведующийди, хъасин каманчайиин мукьмар йивури, мяъли апIурайирихъ хъипрурди (аккомпаниатор). Гьаци дугъу ццийин йисазкьан чан уьмрин 55 йис культурайин цирклиз бахш гъапIну.

«Дагъустандин радиойин гъизилин фондназ» Муса Мягьямедовди ктагъу швнуб-саб мяъли дахил шула. Думу жюрбежюр конкурсарин гъалибчира ву. Бажаранлу артист Табасаран райондиъ гъахьи вари фестиваларин ва гьацира культурайин цирклиан райондиъ ва республикайиъ кIули гъушу хайлин жара серенжемаринра иштиракчи ву.

Муса Мягьямедовдин намуслу зегьмет жюрбежюр пешкешариинди, дипломариинди, гьюрматнан грамотйириинди лишанлу дапIна. 1996-пи йисан 21-пи авгъустдиъ дугъаз «Дагъустан Республикайин культурайин лайикьлу гъуллугъчи» кIуру ччвурра тувнийи.
Табасаран райондин культурайин цирклиъ лихурайи гъарашугъарин арайиъ дугъаз гьюрмат-гьязатра айи. Муса Мягьямедовди жигьил артистариз чаз айи аьгъюваларихъди кюмек тувуйи, дурариз пишейин сирар ачмиш апIуйи.

2022-пи йисан мартдин вазлиъ чан хушниинди аьрза тувну, Муса Мягьямедов ляхниан удучIвну, лайикьлу рягьятвал гъадабгъуз гъушну.
Табасаран райондин культурайин, спортдин ва туризмдин управлениейин коллективди Муса Мягьямедовдин хизандиз ва багахьлуйириз дерин башсагълугъвал ккун апIура.