РД-йин спортдин министерствойин пресс-гъуллугънаан мялум гъапIганси, ноябрин 29-30-пи йигъари Москва шагьриъ Советарин Союздин Игит, армияйин генерал В.Ф. Маргеловдин гьюрмат уьбхбаз бахш дапIнайи армияйин хиларихьди кчIихбан спортдиан вари халкьарин арайиъ вуйи турнир кIули гъубшну. Думу турнириъ ихь ватанагьли Асгьяб Сефербеговди (шиклиъ) гъизилин медаль гъазанмиш гъапIну.
РД-йин спортдин министерствойин пресс-гъуллугънаан мялум гъапIганси, ноябрин 29-30-пи йигъари Москва шагьриъ Советарин Союздин Игит, армияйин генерал В.Ф. Маргеловдин гьюрмат уьбхбаз бахш дапIнайи армияйин хиларихьди кчIихбан спортдиан вари халкьарин арайиъ вуйи турнир кIули гъубшну. Думу турнириъ ихь ватанагьли Асгьяб Сефербеговди (шиклиъ) гъизилин медаль гъазанмиш гъапIну.
Думу талитарин кьяляхъ учу Асгьябдин тренер ва гьацира дугъан эм, Урусатдин спортдин мастер Мартин Сефербеговдихъди сюгьбат гъубхнийча.
«Турнириъ Асгьяб Сефербеговди чан гъагъишнан категорияйин (80 кило) спортсменарин арайиъ варитIан заан натижйир улупну. Хъа дугъа-хъди кчIихуз удучIвдар вари спортдин мастерар вуйи. Гъизилин медаль гъадабгъбан рякъюъ думу 6 ражари спортдин кчIихбариз удучIвну. Дугъан варитIан гъагъи кчIихуб пишекарвалин лигайиан вуйи спортсмен Андрей Кошкиндихъди гъабхьнийи. Думу ужур пишекар спортсмен ву.
Турнириъ саки 150-рихьна спортсменар иштирак гъахьну. Асгьябдин мумкинвалариз ва хъуркьувалариз лигну, думу Урусатдин спортдин мастер кIуру ччвурназра лайикьлу гъахьну», – къайд гъапIнийи Мартин Сефербеговди.
Асгьяб Табасаран райондин ЧвулатI гъулаъ бабкан гъахьну. Думу мектебдиъ 5-пи классдиъ урхурайи-хъанмина спортдиин машгъул гъахьнийи. Сифте дугъу спортдин юкьяр дисбан жюрейиан аьгъювалар гъадагънийи, хъа заан классариз удучIвубси, спортдин кчIихбарин жара жюрйирианра аьгъювалар гъадагъуз хъюгъру. Гъийин йигъаз думу Воронеж шагьриъ кIули гъубшу Яракьлу кьувватарин кубокдин сагьиб, юкьяр дисбаан, спортдин жюрбежюр жюрйириан сатIиди кIули гъуху кчIихбариан хайлин ражари Дагъустандин ва Урусатдин чемпион духьна. Гьацира дугъу ММА-йиъ ва АСА-лигайиъра ужудар хъуркьувалар улупура. Думу пишекарвалин ваъ, хъа гьевескар жюрейин спортдин тажрубайиъ 70-тIан артухъ турнирариъ ва чемпионатариъ иштирак духьна.
«Гьамусяаьт узу Асгьяб грепплингдиан кIули гъябгъру вари дюн’яйин чемпионатдихьна гьязур апIураза. ИкибаштIан, спортдин кчIихбарин гьарсаб жюрейиъ чан къайда айиб ву. Ва гьарсаб жюрейиъ, чан къайда уьбхюри, жара кIчихбар ишлетмиш дарапIди талитар духну ккунду. Грепплингдиан кIули гъягъру му дережайин талитариз думу сабпи ражну удучIвура. Гьадушваъра дугъу хъуркьувалар гъадагъур кIури, миж кайиз», – дамагъ кади аьлава гъапIнийи тренери.
