Аьхиримжи йисари табасаран спортсменарин хъуркьуваларикан ухьу кми-кмиди газатдин машариан урхурахьа, телепередачйириан ебхьурахьуз. Ихь ватанагьлийир Урусатдиъ, Европайиъ ва дюн’яйиъ сабпи йишв бадали вуйи талитариъ иштирак шула, ва дурарикан хайлиндари заан хъуркьувалар гъазанмиш дапIна. Гьацдар бажаранлу спортсменарикан сар – боксдин устад Рамазан Мягьямедхановра ву.

 

Мягьямедханов Рамазан Тимурович 2006-пи йисан Дербент шагьриъ бабкан гъахьну. Думу байвахтнахъанмина спортдиин машгъул ву, ва гъийин йигъаз дугъу му цирклиъ хайлин хъуркьуваларра гъазанмиш дапIна. Рамазан республикайин ва урусатдин дережайин талитариъ саб-швнубан иштирак гъахьну ва хайлин пешкешнан йишварин сагьибра гъахьну.

Заан хъуркьувалар жигьил боксери ццира гъазанмиш дапIна. Январин вазлиъ Хасавюрт шагьриъ кIули гъушу, республикайиъ сабпи йишв бадали вуйи талитариъ дугъу ужудар натижйир ва боксервалин заан устадвал улупну. Хъа улихьнаси, ноябрин вазлиъ, Санкт-Петербург шагьриъ гъабхьи вари халкьарин турнириъ, хиларихъди кчIихбаан вуйи талитариъ Рамазну живанарин арайиъ чан гъагъишнан категорияйиъ (80 кило) сабпи йишв гъадабгъну.

Рамазну гьелелиг 10-пи классдиъ урхура ва спортдиан варитIан заан хъуркьувалар дугъан гьелелиг улихь хьими. Думу талитарихьна гьязур апIурайи тренерар Мурад Къурбанов ва Фарид Къурбанов Рамазан Мягьямедхановдиз спортдиъ ужуб гележег айивалиин умудлу ву. Ухьура, Рамазну спортдин заан кIакIар мютIюгъ апIур кIури, миж кивурхьа.