Декабрин 6-пи йигъан «Дагестанская правда» газатдин редакцияйиъ Дагъустандин промышленностдин ва алвер апIбан министр Низам Халилов республикайин СМИ-йин журналистарихъди гюрюшмиш гъахьну. Дугъу чан улхуб 2022-пи йисандин натижйириз, гьацира 2023-пи йисаз айи планариз бахш гъапIнийи.
Идарайин кIулиъ айирин гафариинди, Урусатдин экономикайиз ригъ алабхъру терефнан уьлкйирин санкцйири илзигурайивализ дилигди, 2022-пи йисан январихъан мина Дагъустандиъ промышленностдин гьясиллувал ужуди артмиш шула. Гъубшу йисан тялукь вахтнахь тевиган, гьаму йисандин январихъан октябриз вуйи улупбариинди, промышленностдин гьясиллувалин индексди 109,2% тяйин гъапIну.
Министри гьяракатниинди уьмриз кечирмиш апIурайи «Шюшейин промышленностдин кластерин артмиш’вал» проектдикан ктибтну. Думу проектдин дахилнаъ юкьуб бицIи проектар а.
«Дагестан Стекло Тара» ООО-йин тешкиллувалиинди европайин тIалабариз жаваб тувру шюшдин гъабар гьясил апIру цех цIийи ва яркьу гъапIну. Му проектдиз 1,6 миллиард манатдин инвестицйир харж апIбанди ву . Гьаму йисан мартдин вазлиъ проектдиз промышленность артмиш апIбан федеральный фонднаан 1,282 миллиард манат буржди тувна.
«Каспийскдин шюшейин мурсликан парчи убхру завод» ООО-йин тешкиллувалиинди шюшейин мурслин парчи гьясил апIувал тешкил дапIна. Душваз 4,1 миллиард манат инвестицйир жалб гъапIну.
«Керамогранит Дагъустан» АО-йин тешкиллувалиинди РД-йиъ керамогранитдин плитка гьясил апIувалин ляхинра тешкил ва яркьу дапIна. Душвазра 1,5 миллиард манатдин инвестицйир жара гъапIну.
«Каспий-Гласс» ООО-йин тешкиллувалиинди «Шюшдин шарикар гьясил апIувал» гьяракатнаъ ипна. Душваз 215 миллион манатдин инвестицйир жара дапIна. 2022-пи йисан мартдин вазлиъ региондин промышленностдин артмиш’валин фондну 50 миллион манатдин займар тувну. Гьаму йисан 16-пи сентябриъ Дагъустандиз РФ-дин Правительствойин председателин заместитель, РФ-дин промышленностдин ва алвер апIбан министр Денис Мантуров дуфнайи вахтна, асас вуди проект гьяракатнаъ ипну.
Низам Халиловди къайд гъапIганси, «Шюше гьясил апIбан промышленностдин кластерин артмиш’вал» проект уьмриз кечирмиш апIбан дахилнаъди 470 миллион манат инвестицйир ишлетмиш дапIна, 38 касдиз лихру йишвар арайиз духна.
Гюрюшдин аьхириъ Низам Халиловди 2023-пи йисаз айи планарикан, промышленностдин карханйирин гьясиллувал за дапIну ккуниваликан, гъюру йисан ачмиш апIру заводарикан, хусуси метлеб айи инвестицйирин гьякьнаан йикьрар йитIбанди вуйиваликан ктибтнийи.
