Улихьна йигъари Табасаран райондин ТIивак гъулан библиотекайиъ Ватандин Аьхю Гъалибвалин машквриз бахш дапIнайи мажлис кIули гъубшну.
Библиотекайин заведующий Мафрижат Бахишялиевайи мектебдиъ урхурайи баяр-шубариз багъри гъул’ан Ватандин Аьхю дявдиз гъушу игитарикан, дурари улупу гьунарарикан, дявдиан кьяляхъ гъафи ветеранарин уьмрикан, Ватандин Аьхю дявдин тарихдикан ва асас женгарикан ктибтну. Мажлисдиъ баяр-шубари дявдин темайиз бахш дапIнайи шиърар гъурхнийи. Жвуван гъуландар, жигьилар, мектебариъ урхурайидар китабар урхбиин маракьлу, табасаран шаирарин ва писателарин эсерарихъди таниш апIури, классикарин машгьур яратмиш апIбар кIваълан дурушбан бадали, культура, аьдатар, тарих уьбхюри, Мафрижат Бахишялиевайи гъулан Урусатдин халкьарин аьдати культурайин Центрин кIулиъ айи Ниягьат Муталимовайихъди сатIиди кми-кмиди жюрбежюр серенжемар гъахури шулу.
Гьамусяаьт гъулан библиотекайин гьисабнаъ китабар урхуз гъюрайидарин кьадар 567 кас ву.
«Гъубшу йисан ич библиотекайиз бицIидарин литература, махъвар, ихтилатар кайи китабар жара гъапIну. Библиотекайин фонднаъ 6635 китаб а. Узу рази апIурайиб гьадму вуки, ич гъулан мектебариъ урхурайи баяр-шубарин аьхюнуб пайназ Абумуслим Жяфаровдин, Юсуф Базутаевдин, Шамил Къазиевдин яратмишарихъди таниш хьуз ккунду, – къайд гъапIнийи Мафрижат Тельмановнайи ич сюгьбатнаъ.
Мафрижат Бахишялиева библиотекайин заведующийди лихури, 15-пи йис гъябгъюра. Гъи китабар урхуз аьшкь айидарин кьадар цIиб шулайивали, бязи жигьиларин фикриъ анжагъ интернетдин тамшир айивали, уьлкейин кIулиъ айидари библиотекйириз бегьемди фикир туври адрували, китабарин фонд цIийи алалапIрайивали ва жара месэлйири заведующийдин кIвак гъалабулугъвал кипра.
Ич сюгьбатнан аьхириъ дугъу, гъулаъ библиотекайиз китабар урхуз аьшкь айидар гъюри имбукьан гагьди, библиотека гъубзруваликан гъапнийи.
Ав, библиотека гъи чарасуз вуди гъубзну ккунду. Душваъ вари а – сикинвал, кIван рягьятвал, насигьятнан теклифар, мюгьюббатну гъургу вая бахтлу гъапIу инсанарин кьисматар, сюгьрин гьевес. Фунур касдихьанра душваъ чан юкIв сикин апIуз шулу. Ва багахь гележегдиъ интернетдихьан аьсси гъахьи жигьилар, вахт зяяди гъядапIурайивалин гъавриъ духьну, библиотекайиз китабар урхуз гъягъюр кIури, миж кивдихьа.
