10-пи декабриъ Табасаран райондин администрацияйин актовый залиъ Дагъустан Республикайиз гъюрайи туристарихъди ляхин апIурайи гидарихъди – экскурсйир гъахру касарихъди гюрюш кIули гъубшну.
Му гюрюш, Дагъустан Республикайиъ ва Табасаран райондиъ туризм артмиш апIуз фицдар уьлчмйир кьабул дапIну ккундуш ва цирклариъ арайиз дуфнайи нукьсанвалар фици терг апIуруш аьгъю апIбан бадали, тешкил гъапIуб вуйи. Серенжемдиъ гьарсар иштиракчийи му месэлйир гьял апIбакан чан фикрар арайиз адагънийи.
Гюрюшдиъ Табасаран райондин главайин заместитель Заур Мусаевди гъапиганси, аьхиримжи йисари райондиъ, туризм артмиш апIбан бадали, хайлин ляхин дубхна. «Туризмдин инфраструктура артмиш дапIна, туриствалин жямяаьтлугъдихъди гюрюшар тешкил апIура, туристар гъягъру рякъяр ккабалгна. Гьамус гъазанжар гъадагъру, дурарихьан налогар уч апIру, инсанариз ляхнин йишвар ачмиш апIру вахтра дуфна, амма гьелелиг ухьу думу гьисс апIурадархьа», – къайд гъапIнийи дугъу.
«Туристар гъюру вахтна ресторанариъ, кафйириъ дурариз йишвар ади шулдар. Гьаддиз гъулариъ туристариз дахъру йишвар, милли хурагар гьязур апIру шартIар яратмиш дапIну ккунду. Туристар гъафиган, ихь диндиз, аьдатариз гьюрмат апIруганси, дурарихъди ляхин дубхну ккунду, палатра ухьухь алабхьруганси алабхьуз гъитну, жикIру йи-шварихьра ухьухь фициб палатдиккди духьну ккундуш, дурариз кидибтну ккунду. Дурарихъди гьацира халачйир урхбаан, атIнар ургъбаан, ихь хурагар гьязур апIбаан мастер-классар духну ккунду, му вари ляхнар пулихъ вуди апIуз шулу. Учу цци Табасаран райондиз туристарин 18 десте хъади гъафунча», – ктибтнийи Дагъустан ва Чечен Республикйириъ экскурсйир гъахру Зульфия Къурбановайи.
Табасаран райондин жямяаьтлугъ палатайин председателин заместитель, меценат, алверчи Айваз Рамазановди, гюрюшдиъ удучIвну улхури, гьял апIурайи месэлйирин гьякьнаан гьамци гъапнийи: «Гъала къайдайиз хпан бадали, йиз терефнаан 500 000 манат харж дапIназа. Гьамус Ярс’ан ТIаттилна туристар гъягъру рякъюхъ сюгьбатар гъахру йишвар ва лигру майднар гьязур апIбанди вуча, гьацира Хили-Пенжигьра. Душварихъ гьяжатханйир ва рукьан челгар дивбанди вуча, гьацира кюкйирра кивну ккунду. Гидарикан райондиз гъюру автобусариъ чпихьди салфеткйир, гьяжатханайиъ ишлетмиш апIру кIажар, шид, дармнар ва гьацира жара лазим вуйи шей’ар гъадагъуб тIалаб апIураза. Гъалайиина ва Рибчрарихьна швушвар хру шубуб машинтIан дедретуб ккун апIураза, дурарра пулихъ – машинарин гьарсаб жергейихьан 1000 манат, музейиъ учIвуз 50 манат гъадабгъуб лазим ву. Дербент шагьриъ, шикларра йивуз кади, машинарин гьарсаб жергейихьан 5000 манат бисура».
Гюрюшдиъ гъитIиркку аьхюну пай месэлйир гьял апIуз шлудар ву. Табасаран райондин кIулиъ айидарра биналу теклифар гьял апIбаз кюмек тувуз гьязурди ву.
«Гъала къайдайиз хпан бадали, 15 миллион манат харж дапIна. Гьюкмихь хьайи касар гьар вахтна тахсиркрарси гьисаб апIувал дишди гъюрадар. Фукьан субботникар кIули гъахура. Зир-зибил марцц апIбан бадали, Дарвгъан ва Мягьрягъан Хючназ гъюру рякъяриина гьар вазлиъ мектебариъ урхурайи 2000 кас удучIвура. Туризм артмиш апIбан нукьсанвалар гизаф а кIури, гидарин терефнаан тIалабар гизаф шула. Гьаддиз, саб вазлилан ясана кьюб вазлилан хъанара уч духьну, гьарсарин улихь тялукь месэлйир дивуз теклиф апIураза», – аьлава гъапIнийи гюрюшдин аьхириъ Табасаран райондин культурайин, спортдин жигьиларин политикайин ва туризмдин управлениейин кIулиъ айи Аьбдулвагьаб Аьбдуловди.
