РФ-дин Правительствойиъ ФСС ва ПФР сатIи апIбан гьякьнаан 2021-пи йисан февралин вазлиъ мялуматар гъахьнийи, хъа 2022-пи йисан июлин вазлиъ РФ-дин Президентди ФСС ва ПФР гьюкуматдин саб идарайиз илтIикIурайивалин гьякьнаан указдиин къул гъизигнийи.
2023-пи йисан садпи январилан башламиш дапIну, Пенсйирин фонд ва Социальный страхованиейин фонд саб гъурулушдиъ сатIи шулу. Думу идарайи сатIи гъахьи идарйири улихьди ватандашарин жа-жаради гьуркIрайи гьюкуматдин гъуллугъар «саб унчIвнан» шартIариинди сатIиди тамам апIиди. Дагъустан Республикайиъ идарйир сатIи хьпан натижайиъ 51 офис арайиз гъафну.
Урусатдин Пенсйирин фонднан сайтдиъ социальный фонднан цIийи пай арайиз дуфна. ЦIийи гъурулуш яратмиш апIбан метлеб – бизнесдиз айи читинвалар цIиб дапIну, гьюкуматди социальный страхованиейин гъуллугъар гьуркIрайи агьалйирин гъатарин кьадар артухъ апIувал ву. Агьалйирихьан электрондин аьхю кьадар мумкинвалар ишлетмиш апIуз, бицIидар айи хизанарихьан, гъагъдиъ айи дишагьлийирихьан саб вуйи пособие гъадабгъуз, хъа страхование апIрударихьан гьякь-гьисаб цIийи жюрейиинди гъабхуз хьибди.
Пенсйирихъди тямин апIбан мялуматарин гъурулуш либхури, саки 30 йис ву. Думу вахтнан арайиъ пенсйир тувбан къанунар, пенсия гьисаб апIбан жюрйир ва чпи пенсийир дигиш гъахьну. Гъи ПФР-ин улупбари пенсйирин швнуб-саб гъурулушдиъ уч гъахьи пенсйир тувбан ихтиярар гьисабназ гъадагъура. Гьаци вушра, гьарсаб вахтнакан вуйи мялумат мюгькамди уьбхюра, гьарсар инсандихьан чан ччвурнахъ ачмиш дапIнайи счетдиъ ккуни вахтна вари мялуматар ахтармиш апIуз шулу.
Пенсияйиз удучIвнайи ватандашарихьанра думу мялуматар ахтармиш апIуз хьибди. Пенсйирин фонднан ватандашар кьабул апIру офисар Пенсйирин фонд ва Социальный страхованиейин фонд сатIи апIбан кьяляхъра вари мялуматар тувуз гьязур ву. Гъийин девриъ ватандашариз саб аьрза тувубтIан лазимди гъубзрадар, кюмек апIбан гизаф серенжемар кьабул апIувал лап рягьят дубхьна. Гизафси аьрза тувувалра жвуван электрондин кабинетдиъ тамам апIуз шулу. Ватандашарихьан «Госуслуги» порталиъ 60 онлайн-сервисар ишлетмиш апIуз шулу. Социальный фондну электрондин сервисар ва пул тувбан ляхин артмиш апIбанди ву. Гележегдиъ, фондназ дурушди, ватандашарихьан хъана артухъ гъуллугъар гьуркIуз хьибди.
