Мялум вуйиси, жилиин зегьмет зигурайидарин ляхнин натижйирин бина хьадукран вахтна ккивру. Яна хьадукран вахтна фициб зегьмет гъизигиш, чвну натижйирра гьацдар хьиди, кIуру гаф ву. Гьаддиз, вари республикайиъси, Табасаран райондиъра гъулан мяишатдин зегьметкешари цIийи бегьериз бина ккивбан хьадукран ляхнар гьяракатниинди давам ва гьарсаб хушлу йигъ мянфяаьтлуди ишлетмиш апIура.

Табасаран райондин администрацияйин «Гъулан мяишатдин отдел» МБУ-йиан гъадагъу, 10-пи майиз вуйи улупбариинди, гьаму йисан, цIийи бегьериз кIури, райондиъ улихь ккимиди 1500 гектариъ хутIлар хъаънийи. Дурарикан 782 гектариъ кIул али мягьсулар гъурзну, гьадму гьисабнаан 272 гектариъ гъулан мяишатдин карханйири. Тумар дурзнайи йишварикан 472 гектар кьюрдун кIул али мягьсулари бисура. Гьамусяаьт райондиъ 472 гектариъ дяхин, гьадму гьисабнаан 272 гектар гъулан мяишатдин карханйириъ, 40 гектариъ нюрх, гьадму гьисабнаан 20 гектар гъулан мяишатдин карханйириъ, 260 гектариъ тахилиз кIури гьяжидяхин ва 10 гектариъ гаргар дурзна. Цци райондиъ 545 гектариъ картфар гъурзну, 500,5 гектариъ – мейвйир ва жара итIру сурсатар.

Улихьна йисари 610 гектариъ дурзнайи гизаф йисариз вуйи укIарихьна цци 70 гектариъсан дурар гъурзну.