Гьар юкьуд йисак саб ражари тешкил апIру футболин вари дюн’яйин чемпионат гьаму йисан Катар гьюкуматдиъ ноябрин 20-пи йигълан 18-пи декабриз кIули гъубшнийи. Думу талитарин финализ Аргентинайин ва Францияйин сборный командйир удучIвну. Футбол уйнамиш апIбан асас вахт сабсиб кьадар голар ирчбиинди ккудубкIбаз лигну, дурариз аьлава вахт жара гъапIнийи. Гьаму вахтнан арайиъра сабпи йишв бадали вуйи гьюжат лап гъизгъинуб гъабхьну ва 3:3 гьисаб ади ккудубкIну. Пенальтйир гъивган ирчу голариинди Аргентинайин футболин команда вари дюн’яйин чемпион гъабхьну.

 

Му талитар чпин маракьлувалиинди, бейхабар дюшюшариинди, хабарсуз магълубвалариинди, ккудудукIру гьар жюрейин гужли гьиссариинди хайлин касарин фикрариъ лап кьаназ гъузди.

ФИФА-йин президент Джанни Инфантинойи Катариъ гъабхьи вари дюн’яйин чемпионат футболин тарихнаъ варитIан ужуб вуйиваликан гъапну. Чемпионатдин талитариз лигуз 3,27 миллион тамашичи гъафну. Мисалназ, 2018-пи йисан Урусатдиъ гъабхьи чемпионатдиз гъафи гьевескрарин кьадар 3,03 миллион вуйи. Амма тярифарихьна гъяйиз, Катариз хайлин «учIврушнар» гъяркъну.

Гьеле сабпи матч ккебгъайизра футболин чемпионатдин тешкилатчйирин, Катарин гьюкуматдин ва гьевескрарин арайиъ наразивалар ва гьюжатар гъахьнийи. Асас вуди дурар трибунйириина ЛГБТ-йин лишнар кайи плакатар хувализ, алкоголин сурсат кайи штар ва пиво масу тувувализ къадагъа апIувалихъди, тамашичйириз ва гьевескрариз рягьятвал гъадабгъуз бегьемди шартIар адрувалихъди, билетар лап багьалу кьиматариз масу туврайивалихъди аьлакьалу вуйи. Сабпи матч ккудубкIубси, гьевескрар, экспертар ва аьдати тамашичйир, Катарин къанунар кьабул дапIну, футболиин машгъул гъахьи.

Му чемпионат сенсацйирин чемпионат гъабхьну. Полуфинализкьан гьаци вуйи. Саки вари гьевескрари ва экспертари финализ Францияна Бразилия удучIвуру кIури гъахьнийи. Хайлиндариз Германияйин футболин командара финалиъ рябкъюрайи.

Дурарин кьисмат Бельгияйин командайира текрар гъапIну. F дестейиъ айи командйирихъди вуйи аьхиримжи талитнаъ Бельгияйин сборный командайи Хорватияйихъди 0:0 гьисаб ади матч ккудубкIбаз лигну, думу группайиан удубчIвундар.

Испанияйин футболин команда Мароккойихьан магълуб гъабхьну. Хъа му шуббиб командйирин дахилнаъра лап бажаранлу футболистар айи.

Мароккойин командайикан жаради дупну ккунду. Диди чан дестейиъ лайикьлуди сабпи йишв гъибисну. 1/8 финалиъ Мароккойин команда Испанияйиин, хъа 1/4 финалиъ Португалияйиин гъалиб гъабхьну. Думу талитарин кьяляхъ Португалияйин сборный командайин машгьур футболист Криштиану Роналду футболин майдандилан ишури гъушнийи. Му талитар мици ккудукIур кIури, гьич саринра фикир дайи. Мароккойин футболистари вари дюн’яйиз чпин командайин кьатI’и гьязурвал ва уьмуми тешкиллувал улупну. Гьяйифки, шубубпи йишв бадали вуйи талитнаъ дурар Хорватияйихьан магълуб гъахьну.

Чемпионатдин кьюб варитIан кIубан футболин командйирин арайиъ гъабхьи матч лап маракьлуб гъабхьну. Францияйин командайин дахилнаъ айи Килиан Мбаппейи, кьюб голиинди улихь хьайи Аргентинайиз хьуб дакьикьайин арайиъ кьюб гол ирчну, гьисаб барабар гъапIну. Хъа аьлавади тувнайи вахт дугъу пенальтийиан сабсана гол ипну. Гьаци вушра му ражари дурариз гъалибвал кьисмат гъабхьундар.

КIваин апIуз ккундузуз, 4 йис мидиз улихьна Урусатдиъ кIули гъубшу вари дюн’яйин чемпионатдин гъалибчйир Францияйин футболистар гъахьнийи. Думуган французарин команда Хорватияйиин 4:2 гьисаб ади гъалиб гъабхьну.

Сабсан далиликан ктидибтди гъитуз шулдарзухьан. Камерундин сборный командайиъ айи футболист Гаэль Ондуа Урусатдиъ аьхю гъахьир, «Локомотив», «ЦСКА» ва «Анжи» футболин командйириъ футбол уйнамиш апIури гъахьир ву. Вари дюн’яйин чемпионатдиъ Камерундин команда Швейцарияйихъди талитназ удучIвурайиган, Гаэль Ондуайи кьюб гьюкуматдин – Камерундин ва Урусатдин – пайдгъар кайи бутсйир (футболистарин ликариин алахьрудар) алахьну.

Европайин спордин цирклин журналистари, экспертари ва гъуллугъчйири наразивалар улупури, ФИФА-йин кIулиъ айидариз къайда уьбхювал тIалаб апIури гъахьну. Швейцарияйихъди вуйи матч ккудубкIбан кьяляхъ, чав Гаэли чемпионатдин журналистариз гьамци гъапну: «Узу чемпионатдиъ йиз палатдик вая бутсйирик Урусатдин пайдагъ кади удучIвуз гьаз гучI апIуру? Урусат – йиз хал вуйиз. Узу душваъ аьхю гъахьунзу. Узу душваъ яшамиш шулаза. Йиз карьерайин кьяляхъ душваъ яшамиш шулза. Узуз сабдихьанра гучIударзуз. Узу сариканра асиллу дарза. Камерун ва Урусат – йиз багъри хал ва Ватан вуйиз. Узу дурарихьинди саб вахтнара йирфарихъди илдицударза».

Гьяйифки, Камерундин сборный команда группайиан удубчIвундар.
Турнирин гъалибчйир – Аргентинайин сборный команда футболиан вари дюн’яйин кубокдин ва 42 миллион долларин сагьиб гъабхьну. Футболин чемпионатарин тарихнаъ му кьадар пул туври сабпи раж ву.