РД-йин сагъламвал уьбхбан министерствойин кIулин инфекционист, ДГМУ-йин тарагъру уьзрарин кафедрайин доцент Саният Мягьямедовайи аьхиримжи кьюб гьяфтайиъ Дагъустандиъ гриппдихъди ва ОРВИ-йихъди аьлакьалуди арайиз дуфнайи аьгьвалатнакан ктибтну ва жюрбежюр серенжемариъ му уьзрарихьан жвув фици уьрхюруш теклифар тувну.

 

 

Дугъан гафариинди, аьхиримжи 2-3 гьяфтайиъ, кIулди Урусатдиъси, ихь республикайиъра грипп ва ОРВИ тара-гъувалин дюшюшар артухъ духьна. Амма му уьзрар тарагъувалин себеб цIийи вирус арайиз дуфнайивалихъди аьлакьалу шуладар. Гьамусяаьт ухьухь тарагънайи А (H1N1), (H3N2) вирусарин гриппди, метапневмовирусари ва синцитиалин жюрейин тарагъру вирусари гъурдларин уьзур арайиз хуру. Дурарихьан ихтиятди гъузну ккунду.

 

«Гьамусяаьт ухьухь швнуб-саб жюрейин инактивированный вакцинйир а. Думу вакцинйири вирус арайиз хуб вая думу вакцинайин руб гъиву кас аьзарлу апIуб мумкин дар, фицики вирусдин жанлу клеткйир йихру дармнарикан арайиз духнайидар ву. Гьамусяаьт больницйириъ ва поликлиникйириъ йивурайи вакцинйир гъийин йигъан ихь республикайиъ тарагънайи вирусарин штаммариз тялукь шула. Гьаддиз вакцинация апIувал – гъийин йигъан гриппдихьан уьрхру анжагъ ялгъуз профилактика ву», – гъапну Саният Мягьямедовайи.

Гьацира жвув гриппдихьан уьрхюз аьзарлу гъахьирихьан ярхлади гъузували, машниин маска алабхьували, хулариъ марццишин уьбхювали, дезинфекцияйи ва профилактикайин жара серенжемари кюмек апIуру.

Саният Мягьямедовайи аьзарлу гъахьидариз, хулаъ гъузну, чпин уьзур кIул’инди сагъ апIуз хътрюгъди, вахтниинди духтрарихьна илтIикIбан теклиф апIура.