Февралин 8-пи йигъан Хив райондин культурайин хулаъ, Украинайиъ гъябгъюрайи хусуси метлеб айи дявдин операцияйин ва РФ-дин Президент Владимир Путиндин тереф уьбхюри, митинг кIули гъубшну.
Серенжемдиъ райондин поселенйирин главйир, жюрбежюр тешкилатарин ва идарйирин кIулиъ айидар, мектебариъ урхурайидар иштирак гъахьнийи. Митинг Урусатдин гимн йивбалан ва, Украинайиъ СВО-йиъ гъийиху эскрарин гьюрмат уьбхюри, саб дакьикьайи ккебехъну дийигъбалан ккебгънийи.
Хив райондин Афгъандин дявдиъ иштирак гъахьи эскрарин советдин председатель Темирхан Агъабаевди, серенжем ачмиш апIури, къайд гъапIганси, Владимир Путинди Урусатдиз фикир тутрувди ва къаршуди гамар алдагъурайи ригъ алабхъру терефнан уьлкйириз, ихтият хьпан бадали, швнуб-саб ражари улихьмиди хабар туври гъахьну.
«Ихь Президентдин сес дурариз гъеебхьундар. Западди вари дюн’яйин улихь чан тIалабар ва шартIар дивра, хъа НАТО гъюблан-гъюбаз Урусатдин сяргьятарихьна багахь шула. Ихь уьлкейиз дурарихьан гъюрайи хатIалувал гьисабназ гъадабгъну, Урусат Украинайиъ хусуси метлеб айи дявдин операция ккебгъуз мажбур гъабхьну. Ухь’ин улуркьуз мумкин вуйи гьяракатарикан хабар гъабхьи Владимир Путинди уьлкейин яракьлу кьувватар жикъи вахтнан арайиъ хъана мюгькам гъапIнийи. Думу лап бажаранлу ва аьхю зигьим хъайи политик, стратегияйин устад ву», – гъапну Темирхан Агъабаевди.
Дугъан кьяляхъ митингдиъ Хив райондин главайин заместитель Мирзабег Багъичев удучIвну гъулхнийи.
«Хусуси метлеб айи дявдин операция гъабхбан асас метлеб – Донецкдин ва Луганскдин халкьдин республикйирин аьтрафариин ислягьвал арайиз хувал, аьдати инсанар ва ихь ватандин маракьар уьрхюб ву. Миржид йисандин арайиъ ихь уьлкейи Украинайиъ арайиз дуфнайи чIуру аьгьвалат ва Донбассдин ислягь ватандашариина хурайи аьрвалар дерккуз дипломатияйин къайдайиинди женг гъабхури гъахьну. Натижайиъ дявикар НАТО ихь аьтрафарихьна лап багахь гъабхьну, ва диди ихь уьлкейиз къурху тувуз хъюбгъну. Верховный Главнокомандующийди улихь дивнайи асас месэла – Украина неофашистарихьан азад апIувал – кIулиз удубчIврувалиин умудлу вуза. Гьацира гьамусяаьт ухьу ва ихь ислягь гележег бадали, чпин уьмрар фида апIурайи эскрариз, дурарин дирбаш’вализ ва игитвализ чухсагъул кIураза. Гъи дурарин хизанариз вари терефариан кюмек тувну ккунду», – къайд гъапIну Мирзабег Багъичевди.
Хив райондин дишагьлийирин советдин председатель Зумрия Сеидягьмедовайи митингдин серенжемариъ иштирак шулайи хусуси метлеб айи операцияйин иштиракчи, гьамусяаьт отпускдиз дуфнайи Селимхан Къиберовдиз райондин вари дадйирин терефнаан чухсагъул мялум гъапIну. Чаз айи гьюрмат гъябкъган, Селимхандин юкIв шадвалин гьиссари абцIнийи. Дугъу дявдин женгариъ айи вари эскрариз сагъ’вал, хъа дурарин багахьлуйириз ва хизанариз сабур ккун гъапIнийи. «Иншаллагь, кьяляхъ гъидича ва думуган хайлин мани гафар пидича. Варидариз ассаламу аьлейкум», – гъапнийи Селимхан Къиберовди.
Серенжемдин кьяляхъ узу, митингдикан чан фикрар ачухъ апIуб ккун апIури, Хив райондин культурайин цирклин кIулиъ айи Казбек Къазиевдихьна илтIикIнийза.
«Митинг Хив райондин Афгъандин дявдиъ иштирак гъахьи эскрарин советдихъди, агьли касарин советдихъди, диндин ва жигьиларин цирклин вакиларихъди, дишагьлийирин советдихъди ва жара идарйирихъди сатIиди тешкил гъапIнийча. Серенжемдиъ 300-тIан артухъ инсанар иштирак гъахьну. Гъи инсанарин арайиъ дюз дару мялуматарихъ хъпехъурайидар ва хусуси метлеб айи операцияйикан наразивалиинди улхурайидар а. Серенжемдиз учу мектебарин пионервожатйириз, ОБЖ дарс кивру мялимариз, мистарин имамариз теклиф гъапIнийча. Ич метлеб – дурари мектебариъ урхурайидариз, жямяаьтлугъдиз Президентдин дюзи курснакан, хусуси метлеб айи операцияйин гьякьлу метлебарикан дугъриди ктибтувал, инсанар гъаврикк ккаувал вуйич.
Гьамусяаьт гъабхурайи политикайин курс дюзуб ву. Бандерайин ва нацистарин терефкрар аьхиримжи вахтна лап гизаф духьнайи. Варидари, дурар амдар кIури, фикир апIурайи. Хъа дурари жиниди 2008-пи йисхъан мина мектебариъ фашизм ва Бандерайин терефкрар заанди дисурайи китабариан дарсар киври гъахьну. Ухьу хусуси метлеб айи дявдин операция кIули гъабхурашра, уьлкейиъ агьалйирин дуланажагъдиз кюмек вуди деетурайи дакьатар артухъ апIура, рякъяр, мектебар, яшайишдин жара тикилишар рас ва цIийидар тикмиш апIувал дебккнадар. Президентди ихь уьлке ва халкь уьрхюз вари дугъри уьлчмйир кьабул апIура. Хив районра дугъан терефкар ву», – гъапну Казбек Къазиевди.
