Жиниб дар, мюгькам сагъламвал инсандин уьмриъ варитIан аьхю девлет ву. Амма, гьяйифки, гъийин девриъ мялум вуйи ва мялум дару себебариан мюгькам сагъламвал хъайивалиинди фурсра апIуз шули имдар. Тялукь аьгьвалатнаъ жямяаьтлугъдин гъуллугънаъ сагъламвал уьбхбан гъуллугъчйир дийигъна.

Му жигьатнаан агьалйириз заан дережайиъди лазим вуйи кюмек тувбан бадали, аьхиримжи йисари ихь гьюкуматдиъ, гьадму гьисабнаан Хив райондиъра, хайлин уж’валнан дигиш’валар дапIна.

Анжагъ саб гъябгъюрайи йисан эвелариан райондин ЦРБ-йиз душван кIулин духтир Жамиля Важибовайин жягьтлувалиинди саки 10-рихьна цIийи духтрар жалб гъапIну. Дурарин гьисабнаан 5 кас «Вари халкьдин духтир» мяналу программайин бинайиинди кьабул гъапIдар ву. Ж.Важибовайи къайд апIурайиганси, больницайин кIулиъ айидари улупнайи ляхин, ЦРБ лазим вуйи духтрарихъди тямин апIбан гъаразнаъ ади, гележегдиъра давам апIбанди ву.

Му месэлйир гьял апIбалан савайи, ЦРБ-йиъ ляхин апIуз лазим вуйи шартIар яратмиш апIбанра гъаразнаъ а. Гьаци, гьамусяаьт терапияйин отделение дибдиан рас апIбан ляхнар гъизгъинди кIули гъягъюра.   

– ЦРБ-йиъ саб жерге расвалин ляхнар улихьнара тамам дапIна. Амма, дидихъди сабси, хайлин камиваларра ами. Терапияйин отделениейиъ саб жюрейинра шартIар адрувализ лигну, учу сифте нубатнаъди расвалин ляхнар гьадлин ккергъунча. Тялукь дигиш’валариз инфекционный отделениейин циркилра ккилибгура… Айи мумкинвалариз лигну, камивалар гьял апIуз зегьмет зигидича, – аьлава гъапIну Жамиля Кьурбалиевнайи.