Вари Урусатдин «Мектебдиз волейбол» проектдин сяргьятариъди май вазлин 14-19-пи йигъари Волгоград шагьриъ уьмуми кьялан образование тувру тешкилатарин командйирин арайиъ волейболиан вари Урусатдин талитарин кьюбпи, «Арсран туп» этап кIули гъубшну. Думу талитариъ 2014-2015-пи йисари бабкан гъахьи живанар иштирак гъахьну.

Талитариъ Дагъустан Республикайин терефнаан Табасаран райондин АхьитI гъулан кьялан мектебдин бинайиинди дюзмиш дапIнайи волейболин команда (шиклиъ) иштирак гъабхьну.

Райондин 3-пи нумрайин ДЮСШ-дин директор Ярягьмед Шамхаловди къайд гъапIганси, му талитариъ ихь уьлкейин жюрбежюр регионариан спортсменар иштирак гъахьну, гьадму гьисабнаан Крым, Кьибла Осетия ва Кафари Кавказ округарианра.

– Табасаран райондин живанарин команда волейболиан лап гужли командйирихъди гюрюшмиш гъабхьну. Амма, гьаци вушра, дурари чпиз варитIан заан гьязурлугъ’вал айиб улупну ва сабпи йишв гъазанмиш гъапIну, – къайд гъапIнийи Ярягьмед Шамхаловди.

Талитариъ кьюбпи йишв Ростов шагьрин, шубубпи йишв Крымдин командйири гъадагъну.
Талитарин натижайиъ пешкешнан йишвариз лайикь гъахьи командйириз тялукь дережайин кубокар, дипломар, медалар тувну.