Аьхиримжи хьуд йисандин арайиъ Дагъустандиъ цIийи аьдат яркьуди тарабгъура. Шагьрариъ ва районариъ гьар йисан, Рамазандин вазли, сатIиди ушв гьибтбан бадали динагьлийир уч дапIну, дурариз ипIруб гьивру серенжемар кми-кмиди гъахуз хъюгъна. Му ужуб ляхин ихь кьюбиб районариъра аьдатназ илтIибкIура.
Ккудубшу элгьет йигъан Хиварин мистан улихь хьайи майдандиин райондин динагьлийирин ва «Хив райондин жигьилар» тешкилатдин кьувватариинди райондин уьмуми ифтар кIули гъубхну. Серенжемдиъ райондин глава Ярмет Ярметов, РД-йин муфтийдин заместитель Агьмад Кахаев, Хив райондин имам Шябан Сялигьов ва 200-тIан артухъ райондин агьалйир иштирак гъахьну.
Уч духьнайидарихьна илтIикIну, Я.Ярметовди аьзиз Рамазандин вазлин багьалу аьдатарикан, жямяаьтлугъдин арайиъ сар-сарихьна гьюрмат уьбхбан, сабурлуди янашмиш хьпан метлеблуваликан мяналу сюгьбат гъапIну.
Дупну ккундуки, мярака дуствалин, сар-сарихьна вуйи гьюрмат уьбхбан лишниккди кIули гъубшну.
