Магьа 2018-2019-пи урхбан йисра чан аьхирихъна гъафну. Вари уьлкейиъси, ихь республикайиъра агъзрариинди выпускникариз аьхиримжи зенг гъивну, гьадму гьисабнаан Табасаран райондин образованиейин идарйириъ 11-пи классар ккудукIу 418 ва 9-пи классар ккудукIу 785 выпускникаризра. Выпускникарин улихь гьамус ЕГЭ ва ОГЭ тувбан жавабдар месэлйир дийигъна.
Ич гюрюшдиъ Табасаран райондин образованиейин Управлениейин начальникдин заместитель, ЕГЭ-йин ва ОГЭ-йин гьязурлугъ’валин ва дурар кIули гъахбан жавабдар Бахиш Аьгьмедовди къайд гъапIиганси, райондин аьтрафариин ЕГЭ къайдайин имтигьнар кьабул апIру шубуб пункт ерлешмиш духьна: Хючна, Хянягъ ва ТIаттил гъуларин мектебарин бинайиин. ТIаттил гъулаъ ОГЭ-йин имтигьнар тувди.
– Имтигьнар кьабул апIру пунктар, Рособрнадзорин тIалабариз асас вуди, улихь ккимиди гьязур дапIна. Электрикдин читинвалар гъахьиш, генераторар дивна, сотовый аьлакьайин сигналар батIул апIру авадлугъарра гъадагънайич ва регистрация дапIнайич, дараматарин айитI марццишнарин гъурулушарра а. Видеойин гюзчивал гъабхбан программайинна аппаратдин комплексдин либхувал ахтармиш дапIна. ДумутIанра савайи, ЦРБ-йиз ва райондин ОМВД-йиз имтигьнар гъягъру йигъарикан мялуматар улихь ккимиди хътаунча, – гъапнийи Бахиш Аьгьмедовди.
Мялум вуйиганси, ЕГЭ ва ОГЭ тувбан гъурулушдиъ асас йишв дидин тешкилатчйири бисура. Дурарин ляхникан, гьязурлугъ’валикан имтигьнар дюзди кIули гъахувал гизаф асиллу ву. Цци райондиъ гьюкуматдин Сабвуйи имтигьнар тувбиин 175 тешкилатчи машгъул хьиди. Дурарикан Хючна гъулаъ айи ППЭ-йин пунктдиъ 85, Хянягъ гъулаъ айи ППЭ-йиъ 55 ва ТIаттил гъулаъ айи ППЭ-йиъ 35 тешкилатчи лихури хьиди.
