Гьаму йигъари «Табасарандин нурар» газатдин редакцияйиз газатдин коллективдин ужур дуст, Гьюкуматдин табасаран драмтеатрин жигьил пишекар Аким Сяидялиев гъафну. Инстаграмдиъ подписка дапIнайи гизаф касариз Аким ужуди таниш ву, фицики, аьхиримжи вахтна чан аккаунтдиъ дугъу кми-кмиди жюрбежюр маракьлу роликар туври шулу.
Аким Сяидялиев Табасаран райондин ТIюрягъ гъулаъ бабкан гъахьну. Мектебдиъ 9-пи класс ккудубкIбан кьяляхъ, думу Дагъустандин культурайин ва искусствйирин колледждик урхуз кучIвну. Гьамусяаьт 4-пи курснаъ урхура.
Аким, гьеле мектебдиъ урхури амиди, сягьнайиин жюрбежюр ролар уйнамиш апIувалиин юкIв алир вуйи. Мялимарин теклифниинди думу актервалин устадвал гъадабгъру курсариъ урхуз гъушну. Гележегдиъ жигьили Гьюкуматдин табасаран драмтеатриъ лихуз планламиш дапIна. Кьюд йис улихьна, учв 2-пи курснаъ урхурайган, дугъу аьхю сягьнайиин «Дишагьлийин ниъ» кIуру кинофильмдин бинайиинди гьязур гъапIу спектаклин игит Аль Пачинойин роль уйнамиш гъапIну. Хъа му спектакль колледждин практикайин цирклиан дивуб вуйи. Табасаран драмтеатрин кIулиъ айидари жигьил актериз фикир тувну ва дугъаз чпихь лихуз теклиф гъапIну.
Акимдин гафариинди, сягьнайин актерин тамаши залиъ деънайи тамашичйирин гьевеснакан гизаф асиллу шула.
«Табасаран драмтеатриъ лихури, гьеле сад йистIан дариз. Узу уйнамиш гъапIу сабпи роль «Ургур ччвучвун гъала» спектаклиъ бицIирнур гъардаш Кьасумдин вуйи. Му роль драмайин ва, гьадму спектаклси, гъагъиб вуйи. Залиъ деънайи тамашичйири гьадму спектаклин игитарин гьарсаб гаф дериндиан кьабул апIурайивали, узуз кIваантIан гьадму образдиъ учIвуз кьувват тувнийзуз. Актервалин пишекарвалиъра теорияйинтIан практикайин тажрубайи аьхю роль уйнамиш апIура»,
– къайд гъапIну ич сюгьбатнаъ Акимди.
Акимдин гафариинди, дугъаз комедйирин жанрар кьабулди вушра, драмайин игитрин роль уйнамиш апIуз гьииди шулу.
Колледж ккудубкIбан кьяляхъ Акимди Москва вая Санкт-Петербург шагьрариъ режиссервалин вая актервалин заан пишекарвал тувру вуздик урхуз кучIвуз кьаст дапIна.
Аким Сяидялиевди чаз теклифар, насигьятар туврайи шаир Эльмира Аьшурбеговайиз, Гьюкуматдин табасаран драмтеатрин директор ва режиссер Аьлимурад Аьлимурадовдизна Жамбу-лат Гьябибовдиз, чан гъарашугъариз чухсагъул мялум гъапIну.
Ич терефнаан Акимдиз гележегдиъ машгьур актер хьувал ва чан кIваъ айи умударихъ хъуркьувал ккун апIурача.
