Аьдат вуйиганси, кIулди вари уьлкейин мектебариъ аьхиримжи зенг шадлугънан линейкйирилан ккебгъну. Багахь йигъари мектебарин выпускникари ЕГЭ тувуз хъюгъди. Дурарин сабпи имтигьян закур ккебгъра. Хъа гъи дурари, чпин мялимарин насигьятарихъ, теклифарихъ хъпехъури, гележегдиз планар дивра.

Вари Урусатдиъ саки 2 миллиондихьна выпускникар а. Дурарикан 750 агъзурихьна 11-пи класс, хъа имбудар 9-пи класс ккудубкIурайидар ву.

«Улариз нивгъар гъюрайиз. Амма ишуз вахт адар. Имтигьнарин кьяляхъ ишидиза. Учу аьхю хьайиз йисар ами кIури, фикир апIурайча. Хъа магьа жигьилвал улубкьну. Ва му нивкI дарувал анжагъ гьаму аьхиримжи зенг йивабхъан гьисс гъапIунча», – кIура Каспийск шагьрин 6-пи нумрайин мектеб ккудубкIурайи Алина Аваевайи.

Къайд апIуз ккундузузки, 2019-пи йисан Дагъустандиъ 12 агъзурна 18 выпускник а. Табасаран райондиъ 11-пи класс – 418 выпускникди ва 9-пи класс – 785 урхурайири ккудубкIну. Хив райондин образованиейин Управлениейин кIулиъ айи Казбек Къазиевди учуз туву мялуматариинди, райондин мектебариъ урхурайидарин кьадар – 2471 кас ву. Дурарикан цци 147 урхурайири 11-пи класс, хъа 233 урхурайи 9-пи класс ккудубкIура.

«Табасарандин нурар» газатдин редакцияйин коллективди ихь выпускникариз имтигьнар заан баллариз тувувал ва гележегдиъ чпин кIваъ айи вуздик кучIвувал ккун апIура. Учвуз ягъурлу рякъ ибшри, ихь таза жигьилар!