Гъулаъ бабкан гъахьи баяриз шиклар зигуз, ккуни ляхниин машгъул хьуз гьичра мюгьлет бихъури шулдар: гагь хутIлиъ-хяраъ укI убшвувал, гагь бистниъ-хутIлиъ картфар кивуз кюмек апIувал алабхъуру, марччар-маларихъ душну ккунду, гакIвлар-дурчар гьадатIувалра баярин вазифа ву. Гьаци вушра, табиаьтди чаз туву бажаранвали инсан чан юкIв хъайи ляхнихъ хъаъру, дугъу думу ляхин апIуз вахт абгуру.
Экпер Мягьямедкеримов 1972-пи йисан Хив райондин ГъуштIил гъулаъ гъвандин уста Гьяжи Мягьямедкеримовдин ва дугъан уьмрин юлдаш, халачйирин устад Сейраханумдин хизандиъ бабкан гъахьну. Экпер байвахтнахъанмина шиклар зигувалиин машгъул гъахьнийи. Гъулаъ миржидпи класс ккудубкIбалан кьяляхъ, Экпер Мягьямедкеримов, Каспийскдин пишекарвалинна техникайин училищейин чертежникар-конструкторар гьязур апIру отделениейик урхуз кIучIвну, гьаддихъди сабси шиклар зигуз улупру мектебдизра гъягъюри гъахьну. Чав армияйиъ айи вахтнара дугъу юкIв хъайи пишейиин машгъул хьуз вахт абгури гъахьну. Гъулаз кьяляхъ гъафиган, инсанарин суратар, табиаьтдиин уткан йишварин, багъри гъулан яшайишдин шиклар зигури, Хив райондин мектебариъ, клубариъ шиклар зигбахъди аьлакьалу жюрбежюр ляхнар апIуз хъюгъну.
Аьхиримжи йисари Экпер Мягьямедкеримов Дагъустандин шиклар зигбан искусствойиин машгъул вуйи художникарин дестейин дахилнаъди жюрбежюр выс-тавкйириъ иштирак шула. 2017-пи йисан Хив гъулаъ дугъан шикларин сабпи выс-тавка, хъа 2018-пи йисан Мягьячгъалайиъ Аварарин музыкайинна драмайин театриъ кьюбпи выставка кIули гъушнийи. 2020-пи йисан Дербентдиъ Нарын-Гъалайиъ «Халкьдин художествойин сяняаьткарвалин йигъ» фестивалин дахилнаъди дугъан «Ватандин рангар» кIуру выс-тавка тешкил гъапIнийи.
2022-пи йисан Москвайиъ СССР-ин халкьдин художник Илья Глазуновдин гъизигу шикларин галереяйиъ Урусатдин халкьарин аьдати культурйирин йисандин дахилнаъди Экпер Мягьямедкеримов Дагъустандин халкьдин яратмишарин хулу тешкил дапIнайи «Дагъустандин багьалу тикйир» проектдин художникарихъди сатIиди вуйи выставкайиъра иштирак гъухьну.
2020-пи йисхъанмина Экпер Мягьямедкеримов Республикайин халкьдин яратмишарин хулан гьар йисан РД-йин художникарин союздин выставкйир гъахру залиъ кIулиъ гъябгъру «Дагъустандин булагъар» проектдин иштиракчи ву.
Дугъу гъизигу шиклар дагъустанлуйиринси, ихь ва жара уьлкйирин хусуси касарин хулариъра а.
21-пи мартдиъ Мягьяч-гъалайиъ Р. Гьямзатовдин ччвурнахъ хъайи республикайин милли библиотекайин выставкйир гъахру залиъ Экпер Мягьямедкеримовди гъизигу шикларин выставка ачмиш гъапIну. Выставка дугъан 30-пи мартдиз давам хьибди.
Серенжем ачмиш апIури, РД-йин культурайин министрин заместитель, Респуб-ликайин халкьдин яратмишарин хулан директор Марита Мугадовайи гъапиганси, 2020-пи йисан «Дагъустандин булагъар» экспозиция гьязур апIурайи вахтна, выставкайин кураторарихьна Хив райондиан вуйи художник илтIикIну. «Мялум дару художникдин саламатвали, фурс ктрували, цIиб нач кайивали экспозицияйин тешкилатчйирин фикир жалб гъапIнийи. Экпер Мягьямедкеримовди гъизигу шикларихъди таниш гъахьиган, думу «Багьалу тикйир» проектдиз учу агурайи художникарикан сар вуйивал гъябкънийчуз. Къайд апIувал лазим вуки, Экпер Мягьямедкеримовди гъизигу шикларин тема жара авторарин темайихьан ярхлаз дубшнадар: пейзажар, нахшрар, ургмар хъайи яшлу касар, милли палат али дишагьлийир ва гьацдар жарадар ву. Вушра гьарсар авторин хасият дугъу дизигнайи шиклариъ атIабгура. Художникдин шиклариз аьхиримжи вахтна ихь жямяаьтлугъдин арайиан дубгурайи нач кайивал, кIваъ зат чIуруб адрувал хас ву», – гъапнийи Марита Мугадовайи.
Выставкайиз уч духьнайи хялари, «Табасарандин нурар» газатдин кIулин редактор Гюлягьмад Маллялиевди, Хив райондин культурайин отделин кIулиъ айи Казбек Къазиевди, шаир Шюшеханум Керимовайи, художник выставка ачмиш апIбахъди тебрик апIури, дугъаз гележегдиъ хъана аьхю хъуркьувалар ккун гъапIнийи.
Авториз, увуз варитIан кьабулди вуйи шикил фунуб вуяв кIури, суал тувнийча. Думу, гимихъ ургмар хъади дуснайи яшлу касар кайи шиклихьинди душну, гьадму шик-лихъ дийигънийи. Гьелбетда, авториз чан гьарсаб шикил багьа ву, фицики дурариъ чан юкIв, жафа тIапIна.
Хъа йиз терефнаан пуз ккундузузки, авторин хили дизигнайи шиклар тярифназ лайикь вуйи: гвар алди булагъдиккан гъюрайи дишагьли, дагълу гъулан пейзаж, кюкйир айи шюшдин гъабар. Хъа узуз варитIан кьабул гъабхьиб марччарин лижахъ хъайи марччлихъан кайи шикил ву. Думу шикли узуз ГъуштIил гъул’ан вуйи, гизаф йисари марччлихъанвал гъапIу ич Аьгьмад аба кIваин гъапIнийи. Шиклик кайи марччлихънин улариъ пашманвалин гьенгар гъяркънийзуз. Хъа дагъларин утканвалин гъавриъ хьпан бадали, дина душну, табиаьтдин утканвал гюзет дапIну ккунду. Хъа учв шикларин автор гьадму чру яйлагъарин багахь аьхю гъахьир ву. Саб ражари ГъуштIилна хялижвди вушра гъушу касдин думу гъулан гъирагъдиъ айи чру чюллер, дагълар гьичра кIваълан дурушур.
