Табасаран райондин Вечрикк гъул’ан вуйи Аьбдулгъадир Мягьямед-шерифович Керимов гъубшу йисан сентябриъ «АРКОТЕК» ООО тешкилатдин дахилнаъди Луганск Халкьдин Республикайин Старобельск кIуру шагьриз дявдин йивбариан зарар дубхьнайи хулар цIийи алауз гъушну. Думу, хайлин вазариъ тикилишар дивбан технический отделин инженерди дилихну, кьяляхъ дуфна. Аьбдулгъадир пишекарвалин тикилишчи ву, ва му ляхин апIури, дугъан гьамус 20 йистIан артухъра ву.
Гьамусяаьт Донбасс терефназ кюмек тувбан заан метлеблувал айивализ лигну, узу дугъахъди гъапIу сюгьбат исихъ жикъиди туврача.
– Аьбдулгъадир Мягьямедшерифович, тикилишар дивру тешкилатдин дахилнаъди Луганскдиъ кьатI’иди фициб ляхин апIури гъахьунва?
– Йиз вазифа, Украинайин терефнаан яракьдиан йивбарикк ккахьу гизаф мертебйирин хулариз дилигну, дурариз духьнайи зарарин актар дапIну, дурар рас апIуз лазим вуйибдин ва удучIвру харжарин гьисабар гъахувал вуйи.
– Натижйир фицдар гъахьнийи?
– Шагьрин администрацияйихъди сатIиди зарар дубхьнайи хулариз лигбан кьяляхъ, варитIан яманди пуч духьнайи гизаф мертеб-йирин 17 хал цIийи алауз къарар адабгънийча. Думу хулар 1944-пи йисан Украина фашистарихьан азад апIбан дявдиъ гъакIи Советарин Союздин игит Николай Фёдорович Ватутиндин ччвурнахъ хъайи кварталиъ айидар вуйи. Гизаф хуларигъ унчIвар-раккнар затра гъимдайи. Дурарин гъваарилан квартирйиризди шид гъюрайи.
Лазим вуйи сметйирин проектар ва тикилишдин материалар гьязур гъапIган, шагьрин учуз табшурмиш дапIнайи тереф цIийи алапIуз хъюгънийча. 600 квадратдин метртIан артухъ пластикдин унчIвар, подъездариъ 140-150 квадратдин метртIан артухъ учIвру раккнар гъивнийча; 2400 квадратдин метр шиферин чардгъар металопрофилихьди гьюдюхнийча.
— Гьаци унчIвар-раккнар гъядру хулариъ инсанар яшамиш шули айин?
— Ав, гизаф инсанар гьаци, унчIвар-раккнарианди полиэтилендин плёнкйир, леъфар гьерхну, тахтйир йивну, яшамиш шулайи.
– Учву тикилишариин лихурайи вахтна Украинайиан яракьдиан йивбарикк ккахъуз къурху адайин?
– Айи, яракьдиан йивурира шуйи, хъа ихь ПВО гизаф ужуди либхурайи.
– Увухъди сарун ихь ватанагьлийир хъади гъахьнийин?
– Ич тешкилатдиъ ихь ватангьлийирикан узутIан адайи. Хъа уьмуми вуди, му республикайин тикилишар цIийи алаъбиин гизаф табасаранар, дагъустанлуйир лихура.
Ич ляхниз учу ерли рабоч-йир гъадагъури гъахьунча. Дурар, жара ляхин адрувализ лигну, аьхю иштагьниинди учухъди лихуз гъюйи.
– Душван агьалйирин учвухьна янашмиш’вал фициб вуйи?
– Душваъ яшамиш шулайи инсанар чпиз шагьур къайдайихъна хуз апIурайи кюмекниин – ихь гьюкуматдин Президентдин, правительствойин политикайиин гизаф разиди вуйи. Дурарин гафариинди, Старобельск шагьриъ аьхиримжи 30 йисан саб жюрейинра тикилишчивалин ва рас апIбан ляхнар дурхну адайи. Шагьрин агьалйири, гьелбетда, ич подряддин тешкилатаризра аьхю чухсагъул кIурайи.
