Украинайиъ хусуси метлеб айи дявдин операция ккебгъхъанмина багарихьди сад йисна кьюб ваз шула. Инсанарин кIул’ина гизаф пашман йигъар дуфна. Хайлин абйир-бабарин машариъ гьич саб шадвал, ачухъ’вал рякъюри имдар. Юкьур бай дявдиъ айи абайин ва бабан юкIв фици ачухъ хьибди?! Дицдар баярин абйир-бабарихьна илтIикIу вахтна, дурар фицдар гафарихьди сикин апIуруш, мюгьтал шулу.
Гъийин йиз макьала СиртIич гъулаъ дуланмиш шулайи Уружбеговарин хизандиан Украинайиъ кIули гъябгъюрайи хусуси метлеб айи дявдин операцияйиъ иштирак’вал апIурайи юкьур гъардшиз бахш дапIнайиб вуйиз. Узу улихьнаси дурарин абйир-бабарихъди гюрюшмиш гъахьунза.
Садир Ибрагьимович ва Людмила Важибовна Уружбеговарин, мициб аьгьвалат арайиз гъюр дупну, гьич фикиркьан гъабхьундар. Сарун вари баяр ляхниъра дийигъну, варидариз хизанар а кIури, сикин духьнайи вахтна, СВО ккебгъуваликан хабар утIубчIвуру. ЦIиб вахт гъябгъяйизра, Буденновск шагьриъ ерлешмиш дубхьнайи военный частнаъ сатIиди гъуллугъ апIурайи юкьри гъардшарра ихь ватан душмнихьан уьбхюз гъахуру.
«Мектеб ккудубкIган, аьхюну бай Рягьим Буденовск шагьриъ медицинайин колледждик урхуз кучIвнийи. Думу ккудубкIбалан къяляхъ, Рягьимди узхьан гьерхнийи: «Адаш, Дагъустандиз ляхин апIуз гъафну кIури, маважиб лап цIиб ву. Эгер яв ихтияр вуш, узуз гьаму узу гъурху шагьриъ ерлешмиш дубхьнайи военный частнаъ фельдшерди лихуз контракт йибтIуз ккундузуз». Эгер дугъу чав дициб рякъ ктабгънуш, сарун фу пидива. Узура фикир гъапIунза: думу мина гъафиган, пул тувну ляхниъ дерккну ккунду, хъа узуз дициб мумкинвал адайи. Гьаддиз, ужуб фикир вуйив, жан бай, дупну, дугъан гафариин рази духьну имиза», – ктибтнийи Садир Уружбеговди.
Дугъан гафариинди, Рягьимди чав гъуллугъ апIурайи йишваъ аьхю гьюрмат гъазанмиш гъапIну. Дугъан кьяляхъ хъайи кьюбпи бай Гьякимдира, призывдиинди яракьлу кьувватарин жергйириъ гъуллугъ дапIну гъюбан кьяляхъ, узура Рягьим айи йишваз гъуллугъ апIуз гъя-гъюрза кIури, контракт йибтIуру. Ва гьамци, варидари сатIиди саб йишваъ гъуллугъ апIурча кIури, Гьялимра, Аьлимра аьхюну гъардшар айи йишваз гъушнийи.
Хъа учвухъди сар байкьан гьаз гъитундарчва, кIури, гьерхган, Садир халуйи гьамциб жаваб тувнийи: «Гъулаъ жигьилари фу ляхин апIиди? Гьюкуматдин ляхнариъ маважиб цIиб ву, гьаци вуйиган, ичв мадар апIинай кIури, узу дурариз мумкинвал тувунза. Гъи Украинайин аьтрафариин кIули гъябгъюрайи хусуси метлеб айи дявдин операцияйиъ хайлин дагъустанлуйир иштирак шула. Му кьадар жигьилар контрактдиинди гъуллугъ апIуз гьаз гъушну? Гьаз гъапиш ихь жигьилар ляхнихъди тямин апIрур адар, тямин гъапIишра, дурариз туврайи маважиб 15 агъзур манат ву. Сарун чара адруган, вари жигьилар контрактдиинди гъуллугъ апIуз душна. Сар-кьюр вушра баладар, юкьур бай дявдиъ айи вахтна кIваз гизаф читинди ву. Я ипIрубдик, я убхърубдик ктарча.
Гьар ражари, телефондиан зенг дапIну, фу гьял ву кIури, гьерху вахтна, гьелелиг инсанарин юкIвар шад апIрустар натижйир адар, адаш, дупну, кьюб гаф дапIну, телефон ктIубшвуру», – сефилвал кади гъапнийи йиз сюгьбатчийи.
Гьамусяаьт Рягьим ва Гьяким Луганскдиъ, хъа Гьялим ва Аьлим Херсондиъ дявдин женгариъ иштирак шула. Думу женгариъ фидакарвал, кьягьялвал ва дирбаш’вал улупбаз лигну, улихьнаси Рягьим Уружбегов Кьягьялвалин орден, хъа Аьлим Уружбегов Суворовдин медаль тувбиинди лишанлу дапIна. Тмуну гъардшарра, лишанлу апIуз улупна кIури, хабрар а, амма гьелелиг дидкан мялум дапIнадар.
Шиклиъ: Рягьим, Гьяким, Гьялим, Аьлим Уружбеговар.
