«Табасаран район» МР-ин уьмуми кьялан образование тувру мектебарин 11-пи классариъ урхурайи 418 выпускникдиз 25-пи майди чпин мектебдин уьмриъ аьхиримжи зенг гъивну. Гьамус дурарин улихь гьюкуматдин Сабвуйи имтигьнар тувбан гъизгъин вахт дийибгъна.
Дурар фицдар пишйирин, ляхнарин эйсйир хьиди? Дурари фициб уьмрин рякъ ктабгъиди? Урхуз душну, дурар багъри райондиз фицдар пишекрар духьну кьяляхъ гъиди? Гьелбетда, гъюзимбу вахтну вари улупиди. Хъа 25-пи майди дурарин машквар вуйи: магьа мектебдин уьмрин 11 йис кьяляхъ гъузну. Шадвалин ва пашманвалин. Сакьюдар йигъарилан накь мектебариъ урхури гъахьидарин байвахтнан мектебдин йисар кьяляхъ гъузиди, дурар чпиз гизаф йисарин арайиъ багъридар гъахьи, чпихъди сатIиди аьхю гъахьи, хъуркьувалар ва читинвалар пай апIури гъахьи мялимарихьан ва чпиз кьюбпи багъри хал гъабхьи мектебдихьан жара хьиди.
Райондиъ урчIвубпи классарин 785 выпускникдизра аьхиримжи зенг гъивну. Дурарин улихьра, гьюкуматдин натижа йивбан аттестацияйин кьяляхъ, важиблу месэла дийибгъура: мектебдиъ урхувал давам апIуруш ясана жара йишвариъ пишекарвалин урхуб ктабгъуруш.
Хъа, фици вушра, вари вахтарин выпускникариз аьхиримжи зенг йивбан йигъ — аку хиялари абцIнайи йигъ ву. Думу йигъан Табасаран райондин мектебариъ шадвалин линейкйир гъахьну. Дурарикан сабдиъ, Хючнаарин кьюбпи нумрайин кьялан мектебдиъ аьхиримжи зенг йивбаз бахш дапIнайи серенжемдиъ, райондин глава Мягьямед Къурбановра иштирак гъахьну. Гьаму йисан душваъ, мектебдин директор Панагь Султановди къайд гъапIиганси, ахиримжи зенг 11-пи классдин 14 выпускникдиз ва 9-пи классарин 39 выпускникариз гъивну. Выпускникарин арайиъ гъизилин медализ лайикьлу кандидатарра а.
— Хючнаарин кьюбпи нумрайин кьялан мектеб райондиъ ужударсдар мектебарикан саб ву. Мектебдиъ ерийин образование тувбаз ужуб шибритI дивна. Гьаддиз, умудлуди пуз шулуки, выпускникарира мектебдиъ урхури гъахьи йисари заан аьгъювалар гъадагъну. Гъийин выпускникарикан ихь райондин, республикайин гележег асиллу ву. Гьаддиз учвук аьхю умуд киврача, — гъапнийи Мягьямед Къурбановди ва выпускникар аьхиримжи зенг йивбан машкврихъди тебрик гъапIнийи.
Линейкайиъ гизафдари выпускникарин адресназ аьдати тебрикнан, насигьятнан гафар гъапнийи. Гьадму гьисабнаан мектебдин директор Панагь Султановди, «Хючна гъулан совет» МО СП-йин глава Аьбдуселим Гираевди, «Табасаран райондин жигьилар» ДРОО-йин председатель Муса Гьябибовди, мектебдиъ улихьна йисари директорариди лихури гъахьидари, сарпи мялимари, классдин руководителари, абйир-бабари. Дурари варидари выпускникариз уьмриъ хъуркьувалар, лайикьлу инсанар хьувал ккун гъапIнийи.
Выпускникарира чпиз аьгъювалар, тербия туву ва гизаф йисарин арайиъ чпиз багъри инсанар гъахьи мялимариз, классдин руководителариз, чпин абйир бабариз чухсагъул мялум гъапIну.
Аьдат вуйиси, сабпи классариъ урхурайидари выпускникариз кюкйир тувнийи.
Аьхиримжи зенг йивбан серенжемар Табасаран райондин мектебариъ тешкиллувалиинди ва маракьлуди кIули гъушну.
Шиклиъ: Табасаран райондин Хючна гъулаъ аьхиримжи зенг йивбан серенжемдин геренар.
