БицIир бабкан хьувал – дугъан абйир-бабаризси, хизандизра, тухмизра аьхю шадвал ву, фицики дюн’яйиина цIийи инсан гъафиган, дугъахъди аьлакьалуб вуйи цIийи умудар, цIийи арзу хиялар – жвуван хизандиз даягъ хьпан, уьмур ужу алапIбан, дюн’яйиъ гьякь’вал дебккан ва гь.ж. – арайиз гъюру. Яратмиш’валихъ хъайи инсанаризра, гьелбетда, цIийи эсер гьязур гъабхьиган, дюн’яйиина бицIир гъювалинсиб шадвал шулу, фицики халис, дерин мянайин эсер, бабу велед хруган зигру аьзабнахь – тевуз шлу читинвалар гьисс апIури, арайиз гъюру – мидкан хайлин шаирари, писателари, музыкантари, художникари дибикIна ва дупна.
Табасаран шаир Эльмира Аьшурбеговайин яратмиш’валин хизан улихьнаси сабсан уччвуб ва дугъри вакилиинди – «Мюгьюббатдин дюъйир» шиърарин китабдиинди – яркьу гъабхьну. Ва гъубшу гьяфтайиъ думу «велед» бахтлу «дадайи» инсанарин арайиз адабгънийи – ДГПУ-йин дагъустан чIаларин факультетдиъ китабдин презентация кIули гъубшнийи.
Аьдат вуйиси, му мяракайиз цIийи китабдин авторин хизандин вакилар ва гъуни-гъуншйир, ляхнин гъарашугъар – шаирар, писателар, хъа гьацира табасаран халкьдин интеллигенция, студентар, поэзияйиин юкIв алидар, – хайлин инсанар уч гъахьнийи. Шаир тебрик апIуз жара халкьарин вакиларра дуфнайи – лакарин шаир Миясат Муслимова, тат халкьдин шаир Пейсах Мишиев, азербайжан шаир Зейнаб Дербендли.
Мярака лап маракьлуди кIули гъубшнийи. Авторин терефназ – дугъан гьаммишан инсанариз кюмек тувуз гьязур вуйиваликан, кIван жумартваликан, багъри халкьдин гъаразнаъ айиваликан – ва дугъан цIийи китабдин терефназ – дидин мяналуваликан, поэзия жигьатнаан заанваликан, гъийин деврин вари гъатар ва иццрушнар атIагнайиваликан – удучIвну гъулхдари хайлин мани гафар гъапнийи. ДГПУ-йин студентари шаирин шиърар гъурхнийи; уч духьнайидар шаирин гафариз дидикIнайи мяълийирихъ хъпехънийи.
Ихь табасаран аьдатариинди, веледдиз ччвур тувбан кьяляхъ, думу тухум-мирасдин, гъулан жямяаьтдин цIарнаъ учIвру, дугъаз жвуван хизан ва ватан бадали уьмур хъапIуз, сарун халкьдиз мянфяаьт хуз гьациб саб ачухъди дупну адру, амма инсанди чав чаланди аннамиш апIру ихтияр тувру. ДибикIнайи (чап дапIнайи) китабра, таза бицIирси, халкьдин арайиз адабгъувал ва дидин гьякьнаан чпин фикрар пувал урхурайидари дидиз гъапIу ихтибарвалик гьисаб ву. Гьаддиз Эльмира Аьшурбеговайин «Мюгьюббатдин дюъйир» китабдира, чаъ дидикIнайи цIарариинди, гъайгъудар гьиссари ацIнайи эсерариинди гьамусдихъантина багъри халкьдиз гъуллугъ апIур кIури, умуд кивурхьа.
