Гъийин вари терефариан заан технологйир гъизгъинди артмиш шулайи девриъ агьалйирин сагъламвалин месэлйири чпихьна артухъди фикир жалб апIура. Фицики, мялум вуйиганси, сагъламвал уьбхбан ва мюгькам апIбан гъаразнаъ айи вакиларин улупбар фикирназ гъадагъиш, артмиш’вализ вари мумкинвалар айи ХХI аьсриъ вари улупбариан мюгькам сагъламвал хъайи инсан агувал лапра читин ляхин дубхьна.
Му гьякьикьатдизра, гьелбетда, чан себебар а: хайлин уьзрар агьалйири алабхьурайи палатдикан, ипIру-убхъру сурсатарикан, хътабгъурайи гьавайиканра арайиз гъюра. Му месэла лап яркьуб ва важиблуб ву. Хъа гъийин макьалайиъ узуз мушваъ асас йишв бисурайи марццишин уьбхбан месэлайикан улхуз ккундузуз.
Табиаьт уьбхбан гъаразнаъ ади, Урусатдиъ, гьадму гьисабнаан йи- швариинра, хайлин серенжемар кьабул дапIна. Вушра…
Ухьу хьадан гъаншариз дуфнахьа. Хъа, мялум вуйиси, хьадан табиаьтдин гюрчег’вали гьарсар кас чахьна жалб апIурайи фаслиъ ухькан гьарсар эрг’вал йивуз табиаьтдиз гъягъюз гьялак шулу. Амма, гьякьикьатди субут апIурайиганси, эрг’вал йивбан кьяляхъ, чпи дусу йишвахь марццишин тямин апIбакан, гьяйифки, сар-кьюрира фикир апIурадар.
Дагъустан чан гюрчег табиаьтдиинди машгьур ву. Хъа Хив райондин гюрчег’вал дидин аьтрафарилан ахмиш шулайи Рапак ва Чирагъ нирари лапра гюзел апIура. Нирар, булагъар инсаниятдин девлет вуйивалин гьарсар кас гъавриъ а, амма гьаз-вуш дурарин марццишин уьбхбакан фикир апIурайидар тек-бирра адар. Гъи райондин сяргьятарилан гъягъюрайи Рапак ва Чирагъ нирарин марццишназ фикир тувиган, рябкъюрайи гьякьикьатдиинди фурсра апIуз шулдар.
Ав, райондин гьюкмин кIулиъ айидарин жягьтлувалиинди, марццишин тямин апIбан гъаразнаъ ади хайлин уьлчмйир кьабул дапIна. Гьадму гьисабнаан, аьтрафар къайдайиккна хпан метлеб ади, кми-кмиди субботникар тешкил апIура. Улихьна йисари гъулариан зирзибил гъабхбан ляхин райондин гьюкмин кIулиъ айидарин регьберваликкди ккабалгнайи.
Хъа 2019-пи йисан эвелариан башламиш дапIну, му ляхин «Экологи-ка» ООО-йин вакилари тамам апIура.
Шаксуз, марццишин гьарсаб хъуркьувалин, сагъламвалин эвел ву. Тялукь саягъниинди марццишин тямин апIбиина улдучIвували ихь табиаьт чиркинваларихьди ккапIрайи зирзибилихьан уьбхрувалик умуд кивуз гъитра. Амма, пуз ккундузузки, гьюрматлу ватандашар, марццишин тямин апIувалтIан, думу уьбхювал важиблу ву. Му ляхнихьна вижнасузди янашмиш махьанай! Фицики жямяаьтлугъдиз сагълам гележег яратмиш апIувал ухькан гьарсарикан асиллу ву.
