Ккудубшу элгьет йигъан Табасаран райондин гизаф гъуллугъар гьуркIру жигьиларин центри «Ургур чвуччвун гъалайин» ва «Рибчрайин» аьтрафар зирзибилихьан марцц апIбан субботник кIули гъубхнийи.

Тарихнан аьхю эгьемият айи ва табиаьтдин адлу йишвар вахт-вахтарик зирзибилихьан марцц апIбан серенжемар гъахувал райондин жигьиларин центрин, жигьиларин жара тешкилатарин аьдатнаъ абхъна. ММЦ-йин директор Рамис Рамазановди гъапиганси, субботникдиъ Гъалибвалин волонтерар, ТОКС-дин вакилар, Юнармия, «Вариурусатдин халкьдин фронт» тешкилатарин вакилар, Хючна гъулаъ айи ПСЧ-йин частнан гъуллугъчйир иштирак гъахьну. Элгьет йигъ жигьиларихьан чпин ляхнаризра бахш апIуз шуйи, амма дурари азад вахт гьамциб баркаллу, жямяаьтлугъ метлеб айи ляхниз бахш апIуз кьаст гъапIнийи. Думу йигъан, жигьиларин жягьтлувал рюгьламиш апIури, субботникдиз райондин глава Мягьямед Къурбановра, «Хючна гъулан совет» МО СП-йин глава Аьбдуселим Гираевра удучIвнийи.

«Ихь райондин тарихнан ва табиаьтдин уткан йишвариз лигуз, гъулариан вуйи агьалйирси, уьлкейин жара йишвариан вуйи гизаф хяларра, яна туристарра, гъюру. Хъа думу йишвар марцциди гъахьиш, душвариз лигуз гъюрайидарира марццишин уьбхиди. Чиркинди айи, марцциди дару йишвариз гъягъюз саризра ккун шулдар. Ихь абйирин айту а: «Марццишин кми-кмиди мургул алдатру йишваъ ваъ, хъа зирзибил дадрабхьру йишваъ шулу». Хъа гьарсаб гъулан поселениейин аьтрафариъ марццишин уьбхювал гьадму гъулан поселениейин агьалйирин буржи ву»,

– гъапнийи, субботникдин иштиракчйирихьна илтIикIури, Мягьямед Къурбановди.