Майин 28-пи йигъан РД-йин Муфтиятди Дербент шагьриъ ерлешмиш дубхьнайи ДГУ-йин филиалин актовый залиъ бицIидарин багъариъ тербия туврайи баяр-шубарин арайиъ «Эдебнан гъизилин къайдйир» ччвур тувнайи конкурс тешкил гъапIну.

Думу конкурсдиъ жюрбежюр миллетарин бицIидари чпин халкьдин аьдатарикан, тарихдикан, культурайикан ктибтну ва бицIи сягьнйир улупну. Конкурсдиъ иштирак гъахьи командйирин арайиъ Дербент шагьрин 30-пи, 29-пи ва 11-пи нумрйирин бицIидарин багъариан вуйи табасаран миллетдин бицIидарра айи. 30-пи нумрайин «ИнчI» кIуру бицIидарин багъдиъ аьгъювалар ва тербия гъадабгъурайи табасаран бицIидар конкурсдихьна гьязур гъапIдар бицIидарин багъдин заведующий Абурия Гьялимова ва методист Саибат Керимханова, 29-пи нумрайин «Гаргар» бицIидарин багъдиан заведующий Карина Къурбанова, методист Гюльнара Наврузова ва тербиячи Салимова вуйи. Хъа 11-пи нумрайин «Даттуч» бицIидарин багъдиан конкурсдихьна табасаран бицIидар гьязур гъапIдар му идарайин заведующий Сабина Савзиханова, методист Карина Абасова, тербиячи Арзу Пашаева ва музыкайин дарсар киврайи Гюляра Наматуллаева вуйи.

«Зиихъ къайд гъапIганси, гьарсаб миллетдин бицIидари чпин культурайикан, аьдатарикан ва тарихи йишварикан ктибтнийи. Ихь бицIидари конкурсдиз Хючна гъулан Рибчрайин ва ХустIил гъулаъ айи Дюрхъян (шиклариъ), ургур гъардшинна сар чуччун гъалайин кIалбар гьязур дапIнайи. Хъа аьдатарин гьякьнаан думу бицIидари, риш швуваз хъаъруган ушвурук фици гъябгъюрашра, чпи гьязур дапIнайи сягьнайиъ улупну»,

– гъапнийи Саибат Гьялимовайи.
Дугъу къайд гъапIганси, финализ удучIву авар, дарги, лезги, табасаран, урус ва дагълу жугьдарин миллетарин баяр-шубарин командйирин арайиъ ихь бицIидар сабпи йишван сагьибар гъахьну. Жюрийи табасаран бицIидари гьязур дапIнайи программайиз заан кьимат дивну.

Серенжемдин аьхириъ табасаран бицIидарин командайи Муфтиятдин музейиз «Эдебнан гъизилин къайдйир» бикIуб кайи бицIи халачи багъиш гъапIну.