Гьаму йигъари Гьюкуматдин Табасаран драмтеатрин коллектив Ватандин Аьхю дявдин темайиан вуйи «Яшамиш хьидихьа» спектакль хьади Хив райондин ЦIудухъ гъулаз ва Табасаран райондин Жулжагъ гъулаз гъушну.
Серенжемар «Сягьнайин устадар – дагъустандин агьалйириз» проектдин дахилнаъди гъурхнийи. Гюрюшдиъ театрин артистари тамашичйириз театриъ чпи гъабхурайи ляхникан, культурайи халкьдин уьмриъ уйнамиш апIурайи роликан, аргъаж шулайи насил тербияламиш апIбак театри киврайи пайнакан ктибтну.
ЦIудихъ гъулаъ гъубшу серенжемдиъ Хив райондин терроризмдиз къаршу коммисияйин пишекар Фахрудин Рамазанов, Хив райондин культурайин, спортдин, жигьиларин политикайин ва туризмдин отделин начальник Зарема Шагьсинова иштирак гъахьну.
Чан удучIвну улхбаъ Фахрудин Рамазановди къайд гъапIганси, культурайин тешкилатарихъди, образованиейин идарйирихъди сабси гьарсаб хизанди, ихь жигьилар экстремист дестйирин жергйирин тясирлуваликк ккадрахъбан бадали, зегьмет дизигну ккунду.
«ВаритIан гизафси думу дестйирин терефкрар шулайидар уьмриъ чпин рякъ дибирихъдар ву. Гьюкуматдин гьюкмин органари экстремизм ва терроризм бинайиан тянкьид апIру вари уьлчмйир кьабул апIура. Профилактика адарди ккилигурайи натижйирихъ хъуркьуз читинди шулу»,
– гъапнийи Фахрудин Рамазановди.
Майдин 29-пи йигъан табасаран драмтеатрин актерарин десте Табасаран райондин администрацияйин терроризмдиз аькси комиссияйин пишекар Назим Аьзизовдихъди сатIиди Табасаран райондин Жулжагъ гъулаз гъушну.
Назим Аьзизовди уч духьнайи тамашачйириз аргъаж шулайи наслиз жямяаьтлугъди тувну ккуни тербияйин важиблуваликан, вари хизандилан ккебгърайиваликан, абйир-бабар чпин веледариз нумуна духьну ккуниваликан, чав маракьлу духьнайи суалариз жавабар бицIидари кечейиъ ваъ, багъри хулаъ дагну ккуниваликан гъапну.
Кьюбиб районарин гъуларин агьалйириз «Яшамиш хьидихьа» спектакль бегьемди кьабул гъабхьнийи.
«Ич асас тамашичйир кьюб дагълу районариъ яшамиш шула – Табасаран ва Хив.
Дагълу гъулариз вуйи рякъяр гъагъи гьялнаъ айивализ дилигди, театрин кIулиъ айидари, зиихъ гъапи проектдин дахилнаъди, райондин варитIан ярхлаъ ерлешмиш духьнайи гъуларин агьалйир театрин искусствойихъди таниш апIуз мумкинвалар агура»,
‒ гъапну ич сюгьбатнаъ Гьюкуматдин табасаран драмтеатрин директор Аьлимурад Аьлимурадовди.
Къайд апIуб лазим вуки, му акцияйин дахилнаъди гъурху спектаклар тамашачйириз пулсузди улупну.
