Майин 29-пи йигъан Табасаран райондиъ ТIивак гъул’ан вуйи Забида Багьудиновна Шихялиевайиз хал гъадабгъуз ихтияр тувру субсидияйин шагьадатнама тувбан серенжем кIули гъубшну. Шагьадатнама «Табасаран район» МР-ин глава Мягьямед Къурбановди тувнийи.
«Табасаран район» МР-ин агьалйирин яшайишдин тереф уьбхру идарайин начальникдин вазифйир тамам апIурайи Гъази Мягьямедовди серенжемдин иштиракчйириз, 2007-пи йисан декабрин 25-пи йигъан РД-йин Правительствойи адабгъу къарарназ асас вуди, 2017-пи йисан федералин бюджетдиан инвалидариз ва инвалид бицIидар айи хизанариз хал гъадабгъуз субсидйир тувбан гьякьнаан вуйи РД-йин зегьметнан ва яшайишдин артмиш’валин министрин приказ гъурхнийи.
Гъийин йигъаз РД-йин зегьметнан ва яшайишдин артмиш’валин Министерст-войин кIулиъ айи Изумруд Мюгьюдиновайи инвалидариз ва инвалид бицIидар айи хизанариз хал-йишв гъадабгъуз, хулар рас апIуз 98 сертификатдиин къулар гъизигну.
Табасаран райондин главайи райондиъ яшамиш шулайи, хулар гъадагъбан нубатнахъ дийигънайи инвалид касарин кьадар фукьан вуш, гьерхнийи. Гъази Мягьямедовдин гафариинди, дицдар ватанагьлийирин кьадар 44 кас ву. Гъи сертификат тувбан кьяляхъ, дицдар 43 кас гъузра. Мягьямед Къурбановди, багахь йисари имбу инвалидаризра яшамиш шлу хулар гъадагъуз мумкинвал хьуз гъитру сертификатар тувур кIури, умуд кивну.
