Инсан иццру духьну ахниъ ахъиган, дугъан багахьлуйир, дугъаз таниш вуйи касар, фукьан дидихъ хъугъуз ккунди адаршра, аьзарлуйихъди аьхиримжи гаф-чIал апIуз хъуркьру. Янаки ужуди-харжиди думу уьмриан гъягъбахьна ва чан гьаммишандиз вуйи архаин хулаъ сикин апIбахьна гьязур шулу. Хъа сад йигъандин арайиъ, сагъламвалин гьякьнаан саб дих-дикIра адарди, багъри кас уьмриан гъушган, фукьан вушра учIвру ляхин ву… Саризра дярябкъри.
Гъийин йиз макьала далдабуйинна зурнайин сеснахъ юкIв хъмиди вахтсузди уьмриан гъушу Сайбуллагь Аьбдуллаевдикан ву.
Сайбуллагь Аьбдуллаевич Аьбдуллаев 1963-пи йисан 20-пи августдиъХив райондин Асккан Яракк гъулаъ Аьбдуллаеварин хизандиъ бабкан гъахьну. Чпин шубур гъардаш ва юкьур чи айи хизандиъ Сайбуллагь шубурпи велед вуйи. Багъри гъулан мектебдин 8-пи (гьамусдин 9-пи) класс ккудубкIу Сайбуллагьди, яшар бегьем гъахьиган, Ватанди чан гъюнариин илипнайи армияйин буржира баркаллувалиинди тамам апIуру. Хъасин Дагъустандин культурайин училищейин методиствалин отделениейик урхуз кучIвру. Пишейин эйси духьну, думу багъри гъулаъ культурайин хулаъ жюрбежюр гъуллугъариъ лихуру. Дугъу чан уьмрин юлдаш Гюлжигьандихъди гъуландари чухсагъул мялум апIру бай Ринад ва риш Маржина дюрхну арайиз адагъну ва дурар эвленмишра гъапIну. Гьяйифки, дурарин веледар ккарцри, Сайбуллагь халуйин абавалин уьмрин кьисмат думукьан ярхиб гъабхьундар …
Ляхнин гъарашугъари рягьматлу Сайбуллагь халуйин пишекарвализ, дугъан инсанвализ, умун хасиятназ заан кьимат тувра.
«Валлагь, 17-пи июндиъ сигьринган узук кубкIу му хабар йиз уьмриъ варитIан аьхю хажалатнан хабрарикан саб гъабхьну. Коллективдин арайиъ Сайбуллагь халу халис адмивалин ва гьюрматнан нумунавалин лишнарин асул вуйи. Райондиз гъирагъдилан гъюру хялар дугъу чан далдабу кIул’инди гьаци кьабул апIуйики, хиял апIарва, чан бализ швушв хури, дурар сумчриз кьабул апIурайидар ву. Хъа думу улихь-кIулихь хьади райондиан тинди вуйи серенжемариз гъяруганра, гьациб фурс ва дамагъ апIуйча. Ав, гъи ихь арайиъ Сайбуллагь Аьбдуллаевич имдаршра, райондин культура артмиш апIбак дугъу киву лайикьлу пай ва ягъурлу рякъ ихь фикриъ гьарган мар-цциди ва акуди гъубзди», – кIура Хив райондин администрацияйин культурайин, спортдин, жигьиларин политикайин ва туризмдин отделин кIулиъ айи Казбек Къазиевди.
Асккан Ярккарин гъулан культурайин хулан директор, зурначи Нюдюряли Аьлияровдихьанра чан гьяйифвал дебккуз шуладар:
«Мейлан, арччулну хил хътабтIси гъахьунзу. Узу – директор, хъа думу – йиз худрук. Вари мяна гьамдиъ адаринхъа?! Сар хътарди тмунур салам-сумчризкьан гъягъюри шулдайча. Йиз бирмиш-буйругъназ ккилилигди, дугъу чаин алиб баркаллувалиинди кIулиз адабгъуйи. Райондиан зенг дапIну, флану йишваъ флану мярака а, ва душваъ учву чарасуз иштирак’вал апIуб лазим ву гъапиш, йиз дуст – далдабу алдру сумчир (узу дугъаз гьаци кIуйза) – саб эл-нефес ададабхъди гьязур вуйи. Ужур пишекар далдабчи вуйи. Дугъаз тувнайи йицIбариинди чухсагъул мялум апIбан кагъзари му субут апIура. Дугъу далдабу, хъа узу – зурна йивури, варжариинди серенжемар ва сумчрин мяракйир кIули гъухунча. Аллагьдин рягьматдикк ишри чав».
«Сайбуллагь аьхю юкIв айи, гьялал ва жумарт кас вуйи. Мицир касдихъди хулхьан, гъулхьан ярхла йишвариъ гастролариъ гъахьну кIури, гъайгъукьан шулдайи. Учв рякъювал рягьматлуйи гьарсар касдиз машквар апIуйи. ЙицIбариинди районариз гъуху жюрбежюр серенжемариан пешкешнан йишвар гъудагъувалик дугъан ва ду-гъахь дарс дубгъурайи баяр-шубарин лайикьлу пай ка. Кур нефс ади, аьхю гъуллугъарихъ ва пуларихъ зат хъергу кас дайи. Аьхюр-бицIир гюзет апIувал ва хайирлу сюгьбатнаъ дурарин гьарсарин тай хьувал дугъан ифдин дамариъ ва хатIнаъ айи. Ригъ али йигъ вуйи сарун! Ужур кас ва гъудубкьу хизандин кIул ву пну, шагьидвал апIураза. Женнет мюгькам апIри чаз», – Гъвандикк гъулан культурайин хулан директор, РД-йин культурайин лайикьлу гъуллугъчи Рамазан Бабаевдин гьякьлу гафарира Сайбуллагь халуйин рюгьяр рази апIур кIури, миж кайиз.
Ихь сягьнайин бажаранлу устад-рин хизандиз, багахьлуйириз башсагълугъвал ва кIван сабур ккун апIурхьа.
