Йиз макьалайин кIул гъурхиган, бязи касарин фикрар-суалар хьади: Гьамгъу фу кIура? Расиъ беълийир гьапIрудар ву? Дурар фуну заманайиъ алдатIну, дармадагъин дапIна? Ав, гьадму фикрарра гьякьлудар хьиди, фицики ихь абйири иту думу багълар-бахчйирин ирс гъи Расиъ имдар.

 

 

Вушра, учвуз Расиъ беълийир ккилигурайибдихъра хъугъай, дустар. Гьаму йигъари йицIуб литр гъябгъру бедрейиъ айи беълийир гъярихъди вуйи гьарарикан сабдигъян уч дапIну гъахунза. Хъа дицдар гьарар, гьяйифки, тIубарииндитIан гьисаб апIуз шулдар. Му гьарар гьапIрудар ву, кIури гьерхиш, гьадму саб вахтна абйири иту багълариз аьзаб туву инсафсузари аьлдяху гьарарин кьабарилан, ччиварилан гъедергнайи гъелемар ву. Хъа гъи магьа дурарикан бегьер тувру аьхю гьарар духьна. Шюкюр ибшри Аллагьдиз, думу вахтна дурарин хилиъ кьабар удугъру, ккудугъру техника адарди хьпаз, дарш дурари гьадму ччивар-кьабаркьан гъитурдайи.

Беълийирин ва гьадму беълийирихьан кьюб ликрин зинаси нимкъарин тIяаьм гъадабгъуз иштагь айидар ва юкIв хъайидар гъулаз гъачай. Гьяйифки, гъи гъулариъ айидариз ихь чIурдиин ерлешмиш дубхьнайи нази-ниъматдин гъадри адар. Кьюбдри кьимат тувнура масу гъадабгъбиин рази ву. Ав, масу гъадабгъну пнура, аьйиб адар. Хъа вушра, жвуван айибдинра эвел дапIну ккунду, аьхир. Жвуву гъапIуб кIваз рягьят, хъа жарари гъапIуб – хилариз. Фукьан назукди ва жвиллиди вушра, хъугъай, жвуван чIурдилан вуйибдихъ я тIяаьмназ, я берекетназ, я дармниз хъубкьруб фукIа адар!