Гьар йисан Дагъустан Республикайин рякъяриъ аварйириъ йихурайи сагъу инсанарин кьадар саки уьзриан йихурайидарихъди барабар ву. Ухьуз гьар йигъан жюрбежюр махлукьатлу хабрарин дакьатариан, мушваъ-тушваъ нубатнан ражарин аварияйиъ инсанар гъийихну кIури, хабрар ерхьурахьуз.
Гьаци, ихь республикайиъра йисандин эвелиан мина хайлин аварйир духьна. Дурар арайиз гъюбан асас себебар – машин хъапIрайидарин гьялак’вал, рякъюъди гъягъбан къанунар дюрюрхрайивал ву.
РД-йин МВД-йин ГИБДД Управлениейиан «Табасарандин нурар» газатдиз туву мялуматариинди, ццийин йисандин эвелиан майин аьхириз республикайиъ 515 аварйир арайиз дуфна ва дурариъ 91 кас кечмиш гъахьну, хъа 726- риз жюрбежюр гъагъишнан зийнар гъахьну. Гъийихдарин арайиъ йицIийирхьуд йис дубхьну адру 2 набалугъ бицIирра а. Хъа жюрбежюр гъагъишнан зийнар гъахьидарин арайиъ чпин яш 18 йис дархьидарин кьадар 76 кас ву. Зиихъ кудухнайи аварйириъ 848 машинаризра зарар гъабхьну.
Дагъустандин УГИБДД-йиан тувнайи аварйир хьпан статистикайиан рябкъюрайиганси, гьаз-вуш гьар йисан гизаф аварйир майин вазлиъ шула.
Магьа ццира майин вазлин эвелиан аьхириз республикайиъ 111 авария гъахьну. Дурарин натижайиъ 28 кас гъийихну, гьадму гьисабнаан 18 йис дархьи 26 живан. Хъа зийнар гъахьидарин уьмуми кьадар 150 кас ву, гьадрарикан 22 кас – 18 йис дархьидар ву.
Зарар гъабхьи машинарикан улхуруш, аварйирин натижайиъ 185 машин чIур гъахьну.
Зиихъ къайд гъапIганси, аварйир арайиз гъюбан себеб – рякъюн иштиракчйири рякъюъди машин хъапIбан къанунар дюрюрхрайивал ву. ВаритIан гизафси алабхъурайи тахсиркарвал – хъапIрайи машин рякъюн къаршу терефназди адапIувал ву. Хъа кьюбпи нубатнаъ алахьурайи тахсиркарвалар – тажруба адарди рулихъ деувал, ички дубхъну машин хъапIувал ву. Мицдар касари рякъюн къанунарикан зат фикир апIурадар ва дурар себеб вуди тахсир ктру касдиз зиян шула. Му жюрейин дюшюшар цIиб хьпан, рякъюъди машин хъапIбан къанунра чIур апIрударихъди женг гъабхбан бадали, аьхиримжи вахтна, федералин рякъяриъси, шагьрарин айитIра, шагьриан шагьриз гъягъру рякъяриъра тахсиркрар ашкар апIуз хайлин видеокамерйир кивна. Думу ляхин гьеле давам шули ими.
Аьхириъ пуз ккундузузки, рулихъ деъну, рякъюз удучIвиган, гьич саб вахтнара хулаъ учвуз дада-адаш, бай-риш ккилигурайиваликан кIваълан магьарханай. Рякъюъ ихтиятди йихьай!
