Агьалйирин яшайишдин тереф уьбхювал – му уьлкейин политикайин важиблу терефарикан саб ву. Жямяаьтлугъдин тяминвалин аьгьвалат ахтармиш апIури, думу гьарган агьалйирин гъаразнаъ шулу.
Агьалйирин яшайишдин тереф уьбхру идарйир шагьрариъси районариъра а. Дицдар идарйир районарин администрацйирин ва РФ-дин зегьметнан ва яшайишдин артмиш’валин Министерствойин гъурулушдиъ шулу.
Учу улихьна йигъари Хив райондин Хив гъулаъ агьалйирин яшайишдин тереф уьбхбан идарайин начальник Надир Мягьямедович Уьмаровдихъди гюрюшмиш гъахьунча.
Дугъу райондиъ яшамиш шулайи агьалйирин игьтияж айи гъатарикан гьамци ктибтну: «Гъубшу йисан октябрин вазлиъ узу гьаму идарайин начальникди тяйин гъапIну. Ляхин апIури цIибтIан вахт дариз. Натижйир йивуз ухди ву. Айи мумкинвалариз дилигну, яваш-явашди ляхин апIураза. Учу гизафси яшлу, кьаби духьнайи касариз кюмек туврача.
Идарайиъ, игьтияж айидариз кюмек апIури, социалин 37 пишекрар лихура. Кьабидариз, инвалидариз палтар ур ччуз, хал марцц апIуз, ипIруб гьязур апIуз читинди ву. Социалин пишекрари гьяфтайиъ сабкьюб ражари гъагъи аьгьвалатнаъ айи инсанариз кюмек апIури шулу. Хив райондин гъулариъ чпин яш 80-90 йис дубхьнайи, ялгъузди яшамиш шулайи кьабидар гизаф а. Дурарин веледар, райондиъ ляхин-кар адрувализ лигну, шагьрариз удучIвну душна. Гизафдар республикайихьан ярхла йишвариъ яшамиш шула. Яш дубхьнайи инсандиз, чан ватан-ругар дирчну, ярхла йишвариз гъягъюз ккундар. Гьаддиз ихь гъулариъ ялгъузди гъузрайи кьабидар гизаф а.
Гьамусяаьт учу яшлуйириз цIийи жюрейиинди кюмек апIуз хъюгънача. Мисалназ, халачи ктIубччвуз, картфиз руг тувуз сариз читинди алабхъуру. Гьаддиз ич пишекрар кьабидариз кюмек апIуз кьюр-шубур кас сатIиди гъягъюзи хъюгъна. Учухь инсанар даккни касдихьан ляхин апIуз шулдар. Му пишейи инсанарихьна рягьимлувал кIваъ ади янашмиш хьувал тIалаб апIура. Ич пишекрари ялгъузди айи кьабидарихъди дурарин кIваз рягьят хьуз гъитру сюгьбатарра гъахуру, фицики субайди айи инсандин кIваз гъагъиди шулу. Гьаддиз дурарихъ хъпехъуз ва гъавриъ хьуз аьгъюди хьувалра чарасуз лазим ву. Сардарова Айханум, Гьябибова Барият гьаму узу ктуху гъиллигъар кайи пишекрар ву. Имбударизра гиран ктапIуз ккундарзуз, вари пишекрар чпин улихь дивнайи месэла тамам апIурайидар ву. Чпин маважиб цIиб вушра, ич пишекрари чпин вазифйир намуслувалиинди тамам апIура.
Идарайин кIулиъ айидар Хив лихурача. Гьар вазлин 5-пи йигъан гъулариъ айи социалин пишекрар совещаниейиъ уч шула, хъа 20-пи йигъан дурар чпин гъапIу ляхнин гьякьнаан гьякь-гьсабар хьади Хивна гъюра.
Ляхниъ алахьурайи месэлйрикан улхуруш, читинваларра а. Яшайишдин гьякьнаан читинвал айи инсанар кми-кмиди учухьна илтIикIури шулу, хъа дурариз кюмек тувуз мумкинвал адарчуз. Улихьнаси Мягьячгъалайиз теклиф дапIну, «Марцци юкIв» кIуру рягьимлувалин тешкилатдиан 5-6 пакет алахьру палтар тувну.
Инвалидарин Йигъаз ич депутат Марат Аслановди 30 аъзур манат жара гъапIнийи. Гьадму пулихъ 30 пакет итIру сурсатар масу гъадагъну, касибвал кайи инвалидариз, бицIидариз пай гъапIунча. Инвалидарин тереф уьбхюри, гьюкуматди удукьру ляхин апIура, инвалидар ляхниз гъадагъувал тIалаб апIура. Ич идарайиъ 13 кас инвалидар лихура. Жара идарйириъра аьхиримжи вахтна инвалидар ляхниз гъадагъура.
Райондиъ жигьиларин дестйиризра кьабидариз, инвалидариз кюмек тувбан тажруба а. Мектебариъ урхурайидари, волонтерари кмикмиди кюмекнан хил гьачIабккура», – къайд гъапIну ич сюгьбатнаъ Надир Уьмаровди.
Ав, яшлуйириз кюмек апIувал – му важиблу месэла ву. Жигьилди вуйи вахтна, ухьу гьарган гьаци гъуздихьа кIури, хиял шулу. Хъа кьабивал хабарсузди, уьзрарра, гьял апIуз гъагъи месэлйирра хъади варидарихьна гъюру. Гьюкуматди кюмек тувра, хъа думу кюмек лап цIибтIан дар. Бязи вахтари хилиъ пул ашра, яшлу инсандихьан тукандиз гъягъюз, чаз дарман гъадабгъуз шулдар. Эгер ичв багарихь гьацдар инсанар яшамиш шулаш, гьюкуматдин кюмекназ миккилиганай, учвхьан удукьру кюмек апIинай.
