Хьадан садпи йигъ – вари дюн’яйин бицIидар уьрхбан Йигъ ву. Думу Табасаран райондиъ жюрбежюр мяракйир гъахбиинди къайд гъапIну. Дурарикан саб – рягьятвал йивбан «Табасарандин юкIв» паркдиъ тешкил гъапIу ва кIули гъубху серенжем вуйи.
Думу серенжем республикайин жумартвалин «Марцци юкIв» фонднан РД-йин Кьибла аьтрафдин Дербентдиъ ерлешмиш дубхьнайи филиали тешкил гъапIнийи. Филиалин кIулиъ айи Анна ТIагьировайин гафариинди, му рягьимлувалин акция тешкил апIуз ва кIули гъабхуз жягьтлувал фонднан гъайгъударвалин советдин председатель, РФ-дин Госдумайин депутат Ризван Къурбановди улупну.
«Табасарандин юкIв» паркдин аьтрафариин али ресторандиъ баяр-шубариз ва дурарихъди хъайи абйирбабариз хурагар али столар гьязур гъапIнийи. Хъа дина райондин жюрбежюр гъуларин поселен-йириан игьтияж айи, маиф бицIидар айи хизанариан 120 бицIириз теклиф дапIнайи. Баяр-шубариз гьацира мяълйирикан, ялхъвнарикан, анимацйирикан ибарат вуйи концертдин программара улупнийи. Серенжемдиъ удучIвну улхури, райондин глава Мягьямед Къурбановди бицIидарин Йигъ къайд апIбан тарихнакан, дидин эгьемиятлуваликан ктибтнийи ва, баяр-шубариз мициб серенжем тешкил апIбаз, спонсорариз ва думу кIули гъабхбаъ жягьтлувал улупдариз чухсагъул мялум гъапIнийи.
Серенжемдиъ гьацира райондин гизаф гъуллугъар гьуркIру жигьиларин Центрин директор, рягьимлувалин «Умуд» фонднан кIулиъ айи Рамис Рамазанов, райондин КЦСОН-дин директор Нариман Аьлиев, «Марцци юкIв» фонднан Кьибла Дагъустандин аьтрафдин Дербентдиъ айи филиалин кIулиъ айи Анна ТIагьирова ва жарадар удучIвну гъулхнийи. Дурари баяр-шубариз шаду бицIивал, кIул’ин ислягь зав хьувал, аку ва бахтлу гележег ккун гъапIнийи.
*** БицIидар уьрхбан вари дюн’яйин Йигъ 1949-пи йисан дюн’яйин дишагьлийирин демократвалин федерацияйин сессияйиъ тяйин ва сабпи ражну 1950-пи йисан 1-пи июндиъ къайд гъапIну. Думу гьядисайи жямяаьтлугъдиз бицIирин ихтиярар уьрхювал тямин апIувал – инсан ккун хьувалин, дюзвалин ва хушбахтлу жямяаьтлугъ аьмалназ хпан чарасуз шартI вуйиваликан кIура.
1-пи июнь, бицIидариз шаду машкварси, аьхюдариз чпи гьарган бицIидарин гъайгъушнаъ духьну ккуниваликан, аьхюдари бицIидарин жавабдарвал дюбхну ккуниваликан кIваин апIурайи йигъра ву
