3-пи июндиъ Табасаран райондин Кьалухъ Мирзайин ччвурнахъ хъайи спорткомплексдин аьтрафдиин райондин аьхю ифтар кIули гъубшну. Рамазандин вазлиъ, гизаф агьалйир уч дапIну, сатIиди ушв гьибтбан серенжемар гъахувал ужудар аьдатарикан вуди гьисаб шула. Дицдар серенжемарин метлеб – жямяаьтлугъдин ара ижми апIувал, агьалйир сар-сарихьна гьюрматлуди, сабурлуди янашмиш хьуз гъитувал ву.

Спорткомплексдин аьтрафдиин кIули гъубшу сатIиди ушв гьибтбан серенжемдиз райондин саки вари гъуларин поселенйириан гизаф агьалйир уч гъахьнийи.

Думу серенжемдиз гьацира республикайин муфтийдин заместитель Аьгьмад Кахаев, Табасаран райондин глава Мягьямед Къурбанов, райондин имамарин советдин председатель Ансар Рамазанов, гъуларин мистарин имамар, диндин ва жямяаьтлугъ тешкилатарин вакилар гъафнийи.

Уч духьнайидарин улихь РД-йин муфтийдин заместитель Аьгьмад Кахаев, райондин глава Мягьямед Къурбанов, райондин имамарин советдин председатель Ансар Рамазанов ва жарадар удучIвну гъулхнийи.

СатIиди ушв гьибтбан серенжемдиъ «Хайрат» дестейин иштиракчйири нашидарра урхури гъахьну.

Ифтариъ удучIвну гъулхдари ва кьяляхъна серенжемдин иштиракчйири къайд гъапIганси, мицдар серенжемари ватандашарин ара, дурарин чвевал ва гафнан сабвал мюгькам апIуру. Дюзди гъапиш, ифтарин лозунгра «Рамазанди сатIи апIуру» вуйи.