Гъябгъюрайи йисан июндин вазлиъ республикайиъ, субсидйир гъадагъувал метлеб вуди, ерли муниципалин образованйирин проектарин конкурс гьяракатнаъ ипну.
РД-йин экономикайин ва аьтрафарин артмиш’валин Министерствойи, штухъди тямин, спортдин ва бицIидарин майднар тикмиш апIувал, культурайин ва туризмдин тикилишар дивувал ва гьацира жара месэлйир гьял апIувал метлеб вуди, конкурс гъабхура.
Гъябгъюрайи йисан республикайин бюджетдиъ му метлебариз 200 миллион манат улупна.
Табасаран райондин администрацияйин пресс-гъуллугънаан учуз мялум гъапIганси, думу конкурсдиъ Табасаран районра иштирак шула.
СТАДИОН
«Конкурсдиз 8 заявка хътаънийи. Райондин уьмуми собраниейиъ жямяаьтди Хючна гъулан аьхю стадион рас апIбан проектдин тереф гъюбх- ну. Конкурсдиъ му проект кьабул гъапIиш, республикайин субсидйирин кьадар ктарди, 5% дакьатар райондин бюджетиданра жара апIиди. Конкурсдин асас шартI гьадму вуки, дидиъ проектариз 5%-тIан кам дарди пулин дакьатар меценатари, дилаварчи касари, юридический касари жара апIувал улупна. Конкурсдиъ иштирак хьпан бадали, мурар чарасуз лазим вуйи шартIар ву», – къайд гъапIийи ич сюгьбатнаъ Табасаран райондин мялуматаринна коммуникацйирин технологйирин отделин кIулин пишекар Маида Аслановайи.
Дугъан гафариинди, Хючна гъулан аьхю стадион гъагъи гьялнаъ а, душваъ трибунйир адар. Саб фила-вуш элебку бицIи трибунара абхъну. Стадион ишлетмиш апIру гьялнаъ амдаршра, гъулан агьалйир спортдиин машгъул хьуз сикин дарди думу стадиондиина гъюри шулу. «Райондин агьалйириз, Урусатдин шагьрариъ яшамиш шулайи табасаран жямяаьтлугъдиз, спортдихьна вижнасуз дару ватандашариз ва рягьимлувалин ужуб ляхниз пул харж апIуз ккуни касариз Проектдик чпин пай кивуз теклиф апIурача», – гъапну Маида Аслановайи.
МИНИ-ФУТБОЛИН МАЙДАН
Му конкурсдиз Табасаран райондиан дуфнайи заявкйирин арайиъ Хючна гъулан 2-пи нумрайин мектебдин гъвалахъ хъайи мини-футбол уйнамиш апIру майдан къайдайиз хпан проектра а.
Мини-футболин майдан къайдайиз хпан гьякьнаан жягьтлувал улупдар «Гаршуки» микрорайондин агьалйир ву. Думу район Хючна гъулан асас аьхю стадиондихьан 2 километр манзилнаъ ерлешмиш дубхьна.
«Мини-футболин майдан гизаф жигьилар яшамиш шулайи ва аьхиримжи йисари яркьу хьуз хъюбгънайи цIийи микрорайондиз ужуб пешкеш хьибди. Душв’ин, мини-футболси, волейбол, баскетбол уйнамиш апIузра мумкинвал шулу. Футбол уйнамиш апIру майдандин гьякьнаан Хючна гъулан администрацияйиз, райондин жигьиларин месэлйириз лигру тешкилатариз хайлин баяр илтIикIура. Райондин хайлин жигьилар гьар гьяфтайиъ саб ражари чиб-чпихъди футбол уйнамиш апIуз Дербент шагьриз, гьадушваъ айи майднариина гъягъюри шулу. ИкибаштIан, я рякъ, я футболин майдан пулсуздар дар. Гьадрарин теклифар гьисабназ гъадагъну, гьаму деврин, яна табии дару укI айи, майдан арайиз хпан проект гьязур гъапIунча. Спонсорар-меценатарра ачуз. Гъийин йигъаз вари гьязурди а», – мялум гъапIнийи «Хючна сельсовет» МО СП-йин глава Аьбдуселим Гираевди.
Конкурсдин комиссияйи мини-футболин проект кьабул гъапIиш, «Хючна сельсовет» гъулан поселение- йи, республикайиан жара апIуз улупнайи субсидйир ктарди, 5%-дин кьадар дакьатар ерли бюджетдианра жара апIиди.
Аьбдуселим Гираевдин гафариинди, гъи Хючнаар футболин майдандин эйсйир хьпан бадали, саби нубатнаъди меценатарин кюмек лазим ву. Дицисдар инсанарихьан «Хючна сельсовет» гъулан поселениейин администрацияйиз вая гъулан глава Аьбдуселим Гираевдихьна илтIикIуз шулу.
