Июнь вазлин 12-пи йигъан ихь Ватандиъ Урусатдин Йигъ къайд гъапIну. Му машквар гьюкуматдин машкврарик вартIан жигьилуб ву. Ихь гьюкуматдин гизаф шагьрариъ му йигъ шагьрин йигъсира къайд апIура, ва гъахру серенжемариъ ватанпервервализ фикир туври, спортдин талитар, концертар, выставкйир кIули гъахура. 180-рихьна жюрбежюр миллетар яшамиш шулайи ихь Ватан, тарихдиъ алахьу читинвалариз дилигди, артмиш шула. Дугъриданра, 90-пи гъагъи йисарихъди тевруган, гъийин вахтна ихь дуланажагъдин гьарсаб цирклиъ аьхю хъуркьувалар гъахьну, гъапишра гьякь ву.
Ихь республикайиъ гьял дапIну ккуни месэлйирин кьадар жара йишвариътIан гизафди вушра, аьхиримжи йисари ихь уьмриъ ужудар гьядисйир артухъ шула. Дагъустандин халкьарин дуствализ, сабвализ фикир жалб апIури, артмиш шулайи баяр-шубариз гьаммишан ватанпервервалин тербия туври, багъри гъулахьна, шагьрихьна, юрднахьна, Ватандихьна вуйи ккунивал гужал апIбан бадали, бицIидарин багъарихъан хъюгъню, хайлин ляхин гъабхура. Къайд апIувал лазим вуки, хизандин айитIра баяр-шубариз ватанпервервалин тербия туври, дурариз ихь Ватандиъ яшамиш шулайи халкьарикан, дурарин тарихдикан, аьдатарикан ктибтури ккунду.
Аьхиримжи йисари ихь гъулариъ айи мектебариъра тербияйиз фикир туври, Урусатдин шагьрарин мектебариъ гъягъру серенжемарихъна гъушу серенжемар гъахури, баяр-шубар артмиш апIури, дурариз жямяаьтлугъдин арайиъ яшамиш хьуз улупура.
Урусатдин Йигъ къайд апIури, Дербент, Дагъустандин Огни шагьрариъ, Дербент райондиъ му йигъаз бахш дапIнайи концертар кIули гъушну. Дербент шагьриъ кIули гъубшу мяракайиъ шагьриъ яшамиш шулайи вари халкьарин мяълийирин устадар иштирак гъахьну. Табасаран чIалниинди мяълийир Альфия Мурсаловайи ва шагьрин 12-пи нумрайин мектебдин 10-пи класс ккудубкIнайи Руслан Маллаевди гъапIнийи.
Ихь гьюкуматдин сабваликан, дуствалин къанунар уьрхюри яшамиш шулайиваликан, ихь аьхю абйири ухьуз гъибту тарих дюбхню ккуниваликан кIури, му йигъан мярака кIули гъабхурайи Наргиз Гьюсейновайи ва Шихзеда Фатуллаевди, уч духьнайидар машкврихъди тебрик апIбан бадали, Дербент шагьрин главайин заместитель Видади Зейналовдиз гаф тувну.
«Дербент шагьрин агьалйир ва дуфнайи хялар шагьрин главайин ва вари администрацияйин терефнаан Урусатдин Йигъахъди тебрик апIури, узу варидариз хъуркьувалар, уж`валар ва сагъ-саламатди яшамиш хьувал ккун апIурза. Ухьу гизаф миллетар айи гьюкуматдин вакилар вухьа. Гьаддиз сар-сариз гьюрмат апIури, ихь халкьарин арайиъ айи аьлакьйир йигълан-йигъаз мюгькам апIури яшамиш шулхьа», – гъапну дугъу.
Чан удучIвну улхбаъ Дербент шагьрин депутатарин Собраниейин депутат Сусанна Мирзахановайи, уч духьнайи баяр-шубарихьинди, жигьиларихьинди илтIикIну, гьамци гъапну: «Закурин йигъан учву ихь Ватандин гъайгъушнаъ духьну ккунду, ва ихь гьюкуматдин тарих кIваълан гьархуз ухьуз ихтияр адархьуз. Урусатдин сабвал уьбхбан бадали, вари дуствалиинди яшамиш хьпан бадали, ухьу чалишмиш духьну ккунду».
Аьхиримжи йигъари Къизлар райондиъ гъабхьи гьядисайи ихь республикайин агьалйирик гъалабулугъвал кипра. Къанунариинди яшамиш шулайи республикйириъ дицдар «улхбариинди» вуйи учIру месэлйир вахтниинди гьял дапIну ккунивалин гъавриъ гъахьиш, ужу ву. Ухьу мясляаьтниинди яшамиш хьуз буржлу вухьа! Гьаму шиирра ихь Ватандикан вуйи фикрар кIули ади гъибикIуб вуйиз, ва газат урхрудариз думу кьабул шул кIури, миж кивраза.
Йиз Урусат
Йиз Урусат! Йиз гирами Урусат!
Гъийин девриъра увуз гьубкIри кьувват,
Уьбхюз ислягьвал гьякь амдру дюн`яйиъ,
Сабвалра яв албагнайи халкьарин.
Йиз Урусат, дявйириъ гъалиб гъабхьи,
Гьар терефнаан увуз илзигура.
ЦIиб улихьна чвйирси сатIиди гъахьи
Халкьар, увхьан ярхла апIузра хъюгъна.
ЧIалнан гъавриъ хьуз даккунди, агура
Гъумшйири яв, океандихъ дустарра,
Уву кабцIуз гизаф чарйир зигури,
Аьсрарин тарихарра гъидикьура.
Яв хлинццикк ккучIвдар ккадагъузра ккунди,
Ипна гьарай вуйибси вари дюн’я.
Мадар апIуз дудубгъну кучIлиинди,
Наан микI хъивиш, увук кипра багьна.
Увкан кIура: «Дявикар ву вартIан пис.
Урусатдиз – санкцйир!» – апIура гьарай.
Гьамциб гъагъдикк гьаъри ава швнуд-сад йис,
Вушра шуладарва гъи дурарин тай.
Йиз Урусат! Йиз кIваъ гьар вахтна айи!
Халкьарин сабвал, дуствал артухъ ибшри!
ГьубкIривуз кьувват лайикьлуди гъубзуз,
Дюн`яйиъ ислягьвалин тумар урзуз!
